Василий Афанасьевич Волков шачсь 1918 кизоня 12 августста Атерь аймаконь Каргоньжяй велеса, сокаень-видиень семьяса. Вов кода корхнесь поэтсь эсь колганза: «Коса ашень уленде, кодама вастс ашень повонда, шачема велезень ашине юксне, сон най ульсь сельминголен:
Веле, веле, шачем веле,
Шачем-касом Каргоньжяй!
Якань-шяянь масторть келес,
Корязт мазы ашень няй!
Маряк, кунара тяса ульсь оцю шяй и лиендсть сей каркт. Вдь веленьке мазы аймакса: фкя пяле вирьхть, омбоцеса – паксят. Вири яксень кстыс, пангс, а паксяса лама киза соксень-витцень, тарвазса нушендонь рость. Лятфтаса сяньге, кода карьса васенцеда молень школав и пяк кенярдень, мзярда макссть “Валда Ян” букварь. Мазыель и пяк кельговсь, мес мокшекс тяштьфоль.
Пинге ётазь велезонк панчсть ШКМ-семилетка. Тоса тонафнемста пяк кельговсь тейне литературась. Классонь келес оцю мяльса лувондынек Захар Дорофеевонь, Михаил Безбородовонь, Яков Пинясовонь стихснон. Шять, эста и появась эсон поэзиянь цятконя, сяс монцьке кармань тяшнема стихт…»
Темников ошень педтехникумть шумордамда меле Василий Афанасьевич покодсь учителькс. Сёрмадома кармась нинге войнада инголе. Стихонза лисендсть «Мокшень правда», «Комсомолонь вайгяль» газетаса, «Колхозонь эряф» и «Якстерь галстук» (тяни «Якстерь тяштеня») журналхнень эса. Ерась нолдамс ни стихонь сборник, но войнань карша сатозе оцю зиян – сявозь и прважазь «ичкоздень васту». Аш мезенксовок савсь лама киза ётафтомс сталинскяй лагерьхнень эса. Воляс лисемдонза меле тонафнесь Темниковса учителень институтса.
Пингонь ётазь повсь Сочи ошу, лама киза ульсь сотф заводть мархта. Сяльде сась Саранскяи, васенда «Резинотехника» заводса покодсь инженеркс, меле – Мордгизса редакторкс.
Стихонь сборниконзон эзда пяледа ламосна лемтьфт иттненди: «Тумонят» (азкст), «Вирь мацихть», «Гуленя», «Пееди дельфин».
Василий Афанасьевичень эряфоц ульсь аф тёждя, лама пичефкс и сталма кибрясонза васьфтсь, но козя и пяк удалаф творческяй киц. Калмаф Сочиса. Эрь тунданя Каргоньжяйсь васьфнесыне лямбе морять ширде мацинятнень, конатне паця лангсост кандсазь валда мялямть…
