Эрзянь содавикс литературоведэнтень, критикентень, филологиянь наукань кандидатонтень, СССР-нь журналистэнь ды Россиянь сёрмадеень вейсэндявксос совицянтень Николай Васильевич Зиновьевнень топодевельть бу 75 иеть.
Чачсь сон 1948-це иень августонь 27-це чистэ Покш Березник ёнксонь Шугурова велесэ. Прядызе Н. П. Огарёв лемсэ МГУ-нь филологиянь факультетэнь эрзянь отделениянть (1972). 1975-це иес ульнесь «Эрзянь правдань» корреспондентэкс, мейле тердизь важодеме Дубёнкав партиянь райкомонь инструкторокс.
1979-це иестэ Николай Васильевич кармась тонавтнеме МНИИЯЛИЭ-нь аспирантурасо, идизе филологиянь наукань кандидатонь диссертациянть ды кадовсь важодеме теке институтсонть старшей научной сотрудникекс.
1990-це иестэнть саезь сон – РФ-нь Образованиянь министерствань национальной проблемань ды образованиянь институтонь эрзянь-мокшонь филиалонь прявт. Мейле ладязель МНИИЯЛИЭ-нь литературань ды народной творчествань отделэнь прявтокс (1996). 2001-це иестэ велявтсь «Эрзянь правдав», кармась культурань отделэнь редакторокс.
Н. В. Зиновьев анокстынзе «Тештине» (1993), «Цёковне» (1994), «Чивалдо» ды «Горниповне» (1995) тонавтнема книгатнень. Теде башка, сон сёрмадсь ламо монографият, очеркть, стихотвореният ды юморескат.
1995-це иестэ лиссь «Человек и время» пусмозо. Тесэ ёвтневи эрьва кодамо шкань сермадейтнеде, кода сынь эрясть ды эрить, сюпалгавтсть ды сюпалгавтыть раськень литературанть. Критикесь чарькодевти: теде эряви содамс аволь ансяк эрзятненень ды мокшотненень. Истямо покш тевенть эйстэ, кодамо литературась, а кода аштемс ве ёно лия раськень ломантнененьгак. «Человек и время» книгадонть мейле Николай Васильевич казсь ловныцятненень очеркень пусмо, конань лемдизе «Валдо тештень пусмокс» (1996). Эйсэнзэ тагояк кортави эрзянь ды мокшонь сёрмадейтнеде, учёнойтнеде-литературоведтнэде, раськенек культуранть кастыцятнеде, ванстыцятнеде. «Путь учёного» книгась, кона алтазь эрзянь содавикс учёноенть-литературоведэнть И. К. Инжеватовонь эрямонь ды важодемань кинзэ невтемантень, лиссь 1997-це иестэ. Теде башка Р. З. Хайрулин учёноенть марто сёрмадсь Рав чирень ды Урал ёнксонь раськетнень литератураст тонавтнемань программа. Анокстась монографият: «Душа народа», «Здравствуй, профессор!», «Как это было?». Эйсэст ёвтневи В. В. Горбунов ды Ф. И. Сетин учёнойтнень, Д. М. Морской поэтэнть эрямонь ды шкинемань кидест, литературань кастомань тевентень покш путовксост. Сёрмадсь «Ступени роста» монография, косо ванновить эрзянь ды мокшонь школатнесэ тиринь литературанть тонавтнемань кевкстематне.
Николай Васильевич Зиновьев кадсь пек неявикс тешкс мокшэрзянь наукасонть, литературасонть, журналистикасонть. Кулось 2007-це иень январень 2-це чистэ. Калмазь Саранскойсэ.
