Социалистическяй Трудонь Геройсь, рузавась М. С. Парецкова шачсь иможковонь 19-це шиста 1923-це кизоня МР-нь тяниень Ковылкина аймаконь Токмова велеса, сокаень-видиень семьяса.
1943-це кизоста сявомок ушедсь покодема тракторса, 1968-це-80-це кизотнень ульсь Ковылкина аймаконь «Россия» колхозса механизированнай звенань вятикс. Мария Степановна пяк лац содазе эсь тевонц, виень-эрьгянь апак ужяльтть мольсь инголи и вятезень мельганза ялганзон. Сонь звенац вельф пяшкотькшнезе планть паксянь серотнень видемста и кочкамста, сяс фалу мольсь васенцекс эрь тевса. Ся пингть няевикс кеподсь сёронь и лия иможень касфтомать ширец, паксятне каннесть козя урожай. М. Парецкова кельгома тевонцты макссь эряфстонза 35 киза. Ульсть аф тёждя, но павазу шит, конатнень авась лятфнезень валда мяльса. Тяфта покодеманкса и цебярь сатфксонкса ульсь казьф Ленинонь лемса орденца и аф весть лама лия казнеса. Велеряйхне кельгозь панжада вайме и ляпе седи Мария Степановнань, конань сембе эряфоц ульсь сотф колхозть, модать и ломаттнень мархта.
Кулось 1995-це кизоня эсь шачема-касома велесонза. Мария Степановна Парецкованди оцю путфксонкса колхозонь эряфти Ковылкина ошса путф бюст.
