Якшамковонь 18-це чистэ топодевельть бу 105 иеть эрзянь прозаикентень, очеркистэнтень, драматургонтень, СССР-нь Сёрмадеень вейсэндявксонтень совицянтень, Ине Отечественной войнань участникентень Иван Захарович Антоновнень. Сонзэ лемезэ ведьгеменце иетнестэ гайгсь минек покш масторонть келес. Очеркензэ лиснесть «Правда» газетасо, Московонь пек содавикс журналтнэсэ. Теке марто вейсэ, сон неявикс тешкс кадсь эрзянь литературасонтькак кода романист, новеллист ды драматург.
Иван Антонов чачсь Чувашиянь Батыревской райононь Сигачи эрзянь велесэ. Од порасто важодсь ликбезсэ тонавтыцякс, вельсоветэнь секретарекс.
Алатырень лесотехнической рабфаконь прядомадо мейле важодсь райгазетасо. Зярдо ушодовсь Ине Отечественной войнась, сон важоди «Родина зовет» дивизионной газетань ответственной секретарекс. Ютынзе войнань толов китнень, ульнесь Чехословакиясо, Венгриясо, Румыниясо. Казезель зярыя орденсэ ды медальсэ.
Войнань прядомадо мейле И. Антонов сы эрямо Саранскоев. Важоди «Красная Мордовия» газетань корреспондентэкс, «Литературная газета» ды «Литературная жизнь» газетатнень собкоррокс. Зярыя иеть ульнесь Мордовиянь сёрмадеень вейсэндявксонь секретарекс.
Васенце стихотворениязо печатазель 1936-це иестэ Алатырень райгазетасо. Сехте содавиксэкс сонзэ теизь очерктне, конат сёрмадозельть рузонь кельсэ – «Ухабы на дорогах», «Разлив на Алатырь-реке», «Трудодень», «На перепутье» ды лият. Неть очерктнесэ сон кепсесь се шкань асатыкстнэнь, берянь тевтнень, конат кирдсть минек ломантнень эрямонь икелев молеманть.
Ловныцясь покш мельсэ вастызе «В семье единой» (1954) романонзо. Ниле иеде теде икеле «Изнямо» альманахсонть романонь васенце вариантось лиснесь «Кода кирвазить тештне» лементь ало. Романсонть невтевить 1941–1945-це иетне, кода минек масторонь зярыя раськень ломантне тюрсть вейсэнь ятонть каршо. Сёрмадеесь парсте невтизе: минь ине вий, зярдо вейсэтяно.
И. Антоновонь перанзо алдо лиссть истят драматической произведеният, кода «Ульнесь истямо тейтерь» (1957), «Паро ки» (1960) ды лият. «Девичьи глаза» (1957) книгантень совасть новелланзо ды ёвтнеманзо. Авторось сёрмалесь литературоведской статьяткак.
