Языковедсь, филологическяй наукань докторсь (1997), профессорсь (2000), МР-нь наукань заслуженнай деятельсь (2002), МР-нь Государственнай премиянь лауреатсь (1999) Поляков Осип Егорович шачсь 1953-це кизонь 24-це апрельста Зубово-Полянскяй райононь Паронза (Промзино) велеса, крестьянонь семьяса, мокша. Аделазе Вад-Веляземонь (Вад-Селищань) средняй школать и поладозе тонафнемать Мордовскяй государственнай университетса (1975).
Вузса тонафнемста сась мяльс: филологти эряви улемс сембе ширде аноклаф ломанькс. Ётась аф лама пинге, и Поляковонь кармасть путнемонза примеркс аф аньцек тонафнемаса, но и общественнай тевонь вятемаса. Факультетонь артисттненди Осип Поляков тяшнесь концертонь сценарийхть, морот. Сонцьке кельгозе кштиманц-мораманц. Университетть аделазе якстерь дипломса, лиякс мярьгомс – аньцек ветеса. Тяда меле факультетонь Учёнай советть мярьгомас коре кирдезень экзаметтнень Кялень, литературань, историянь и экономикань Мордовскяй научно-исследовательскяй институтонь аспирантурав. И тусь тонафнема Москуву СССР-нь Наукань академиять языкознаниянь институтозонза, коса покодсь научнай руководителец Александр Павлович Феоктистов. Аспирантурань кизотне ульсть аф тёждят. Стипендиять лангс стакаль эрямс, сяс савсь покодемс вагононь шамникс, сторожкс. Вдь эрявсь арнемс Москуву консультацияс, библиотекав, Ленинградскяй университету, Л. В. Бондарко профессорть фонетикань лабораториязонза, коса эрявсть ётафтомс экспериментт мокшень кялень гласнай и согласнай вайгялькснень азомаснон коряс, Эстонияв, Тартунь университету. И сембе сяка ся кизотнень лувондсыне инь павазукс. Кандидатскяй диссертациянц О. Е. Поляков аралазе 1980-це кизоня Тартунь университетса. Диссертациясонза крхкаста и лама ширде ванфт сембе кизефксне. Звукнень коряс эксперименттнень ётафтозень Ленинградскяй госуниверситетть фонетическяй лабораториясонза.
Тяда меле сон покоди Научно-исследовательскяй институтса: васенда младшай, сяльде старшай научнай сотрудникокс, учёнай секретарькс, мокшэрзянь языкознаниянь отделса вятикс (2001-це кизоста сявомок, лемдеви филологиянь и финно-угроведениянь отделкс).
Учёнайть аф ёмла путфксоц мокшэрзянь кялень наукати. Тяфта, кялень научно-практическяй конференциять, кона ётась Саранскяйса 1993-це кизоня, пцтай марнек аноклазе и ётафтозе сон. Сяльде тя конференцияса примаф решениятнень коряс ульсть нолдафт мокшень и эрзянь кяльса сёрмадомань, корхтамань и пунктуациянь правилатне, а О. Е. Поляков А. Н. Келинать мархта марса тяштсть «Русско-мокшанский школьный словарь».
Сонь кядялонза аноклафоль и нолдафоль Москуса «Мокшень-рузонь валкссь» (1998), конань инкса тяштиень коллективти (сембоц сисем ломаненди, тяконь лувксса, конешна, и О. Е. Поляковонди) максфоль Мордовия Республикань Государственнай премиянь лауреатонь лем. Институтонь филологиянь отделста покодихне тяштезь «Мордовия» энциклопедияти «Языкознания» пяльксть, ниле томса «Тяниень пингонь мокшэрзянь кяльхне» книгатнень – лиссь ни васенце томсь («Фонетика»), курок лиси «Русско-мокшанскяй валкссь».
Эсь докторскяй диссертациянц аноклазе аф фкя кизоста, тянди савсь путомс лама вий, эрьгя, пинге. Сонь корязонза лиссть кемонь книганза и сизьгемоньда лама статьянза. Синь ётксост тяфтапне, кода «Русский язык в жизни мордовского народа», «Атянь-атяньке и синь кяльсна», «Мордовия многонациональная: взаимоотношение народов – взаимоотношение языков», «Современные мордовские языки. Фонетика», «Русско-мокшанский разговорник», «Учимся говорить по-мокшански», «Мокшанский язык». Сембе синь пяк эрявихть аф аньцек наукаса, но и стакшинь эряфса. Васендакиге – школань учительхненди, вузонь тонафтыхненди и тонафнихненди, библиотекаса покодихненди. Сёрмадсь лама научнай и учебно-методическяй работа, монографият, учебникт, тонафнемань пособият, валкст. Осип Егорович кирди соткст Библиянь ётафтомань институтть мархта, ётафтозе мокшень кяльти «Матфеень коряс Евангелиять».
Профессорть наукаса сатфксонзон колга содайхть и омба масторса. Тяфта, 1994-це кизоня Международнай библиографическяй обществась казезе сонь Международнай культурань честень дипломса (Севернай Каролина штатсь, США), а 2001-це кизоня лемонц сувафтозь «XXI веконь 2000 содаф учёнайхне» книгати, кона лиссь Кембриджскяй университетса (Англияса).
Материалсь аноклаф А. С. Пушкинонь лемса Национальнай библиотекань национальнай и краеведческяй отделонь фондттнень коряс.
