28-це апрельста топоди 70 киза шачема шистонза композиторти, музыковедти, педагогти, Россиянь композиторонь Союзонь члентти, МР-нь искусствань заслуженнай деятельти, РФ-нь культурань заслуженнай работникти, народнай артистти Сергей Яковлевич Терхановонди.
Сон шачсь служащаень семьяса, аделазень Горьковскяй, Казанскяй консерваториятнень. 1973-це кизоста сявомк 1987-це молемс покодсь театральнай училищаса, народнай творчествань областной научно-методическяй центраса, Саранскяй музыкальнай училищаса.
С. Терханов сёрмадсь камернай оркестранди «С. Д. Эрьзянь скульптуранзон мотифснон коряс сюита», симфоническяй поэма, кантатат, хореографическяй маниатюрат, духовнай валонь коряс хоровой сочинениянь цикла, камерно-вокальнай произведеният, морот, фортепиананди сочиненият. Мордовияса васенцекс сёрмадсь балет «Кият тон…», ёфкс «Салтан оцязорть колга» музыкальнай феерия, музыка драматическяй, някань театрань спектаклянди.
Сонь музыкац кайгсь «Од лепт» 3-це всесоюзнай радиоконкурсса, «Юрмола-90» эстраднай моронь всесоюзнай телеконкурсса, балетонь, артистонь международнай конкурсснень эса и тяниень пингть кайги аф аньцек Мордовияса, но и странаньконь лама уженява.
