25-це январьста топодель шачема шистонза 95 киза СССР-нь Писателень союзонь членти, Мордовскяй АССР-нь заслуженнай писательти, Мордовия Республикань народнай писательти, Славань III степенень орденонь кавалерти Анатолий Прохорович Тяпаевонди.
А. П. Тяпаев шачсь 1928-це кизонь 25-це январьста Пензенскяй областень Беднодемьяновск ошса. Тядянц куломда меле кассь алянц шачема ширеса – Кадошкинскяй райононь Алякс (Паево) велеса. Тяса сон аделазе начальнай школать, а сяда тов тонафнесь Глушковань средняй школаса. Великай Отечественнай войнань кизотнень кенерсь покодемс колхозса. 1949-це кизоня служась армияса. Куду мрдась 4 кизода меле. Эстокиге сась Саранскяи и кармась работама литсотрудникокс «Мокшень правда» газетаса, сяльде ульсь отделонь вятикс, ответственнай секретарькс. Тяка пингть тонафнесь заочна Мордовскяй госуниверситетонь историко-филологическяй факультетса историческяй отделенияса. 1966-це кизоня ётась «Мокша» журналу. Васенда путфоль ответственнай секретарькс, а сяльде – главнай редактороль. 1976–1988-це кизотнень Мордовиянь писателень Союзть председателенц заместителецоль.
Эсь творчестванц А. Тяпаев ушедозе поэзияста. Васенце стихоц «Урожай» лиссь «Мокшень правда» газетаса 1947-це кизоня. «Тундань пизем» васенце поэтическяй сборникоц лиссь 1959-це кизоня. Тяда меле А. Тяпаев тяштсь и нолдась стихонь и прозань 23 книга мокшень и рузонь кяльса: «Тядя», «Алят», «Клены на окне», «Искры из камня», «Эрек ведь», «Миртть-рьват», «Алянь мода», «Мекольдень атямсь», «Супруги», «Седть лангса тол», «Ёронь сельме», «Тяштю менельть ала», «Яку атянь эшиняц», «Рассказы из жизни Захарки», «Соседи», колма томса кочкаф произведеният и стак тов. Синь башка книгакс лисендсть Мордовскяй книжнай и Москувонь «Идень литература» издательстватнень эса.
«Тяште лангса алашат» и «Седть лангса тол» книганзон инкса А. П. Тяпаевонди максф Мордовия Республикань Государственнай премия.
А. П. Тяпаев нинге сермадсь юмористическяй и сатирическяй азкст и стихотвореният, лама рецензият, конат тянемс лездыхть сяда лац содамс мокшэрзянь литературать, отвечамс оржа, аф шарьхкодеви кизефкснень лангс.
Ламоц произведениянза печатлафтольхть марстонь сборникнень, периодическяй изданиятнень эса. Синь тонафневихть школаса, вузса.
Мордовиянь заслуженнай писательть Анатолий Прохорович Тяпаевонь лемоц кемоста сувась национальнай литературань поэттнень и писательхнень ёткс. Сон фкя инь кельгома и содаф писательсь аф аньцек мокшэрзянь крайса, но и сембе странаса.
