Кие вечксы эрзянь литературанть, се парсте содасы Александр Константинович Мартыновонь шкинеманзо. Поэт, прозаик, переводчик – истямо ёндо сон невтизе эсь сёрмадеень ёрокчинзэ. Даволковонь неть читнестэ сонензэ топодевельть бу 110 иеть.
Эрьва эсь книгантень – улезэ те стихень сборник, роман ды повесть, ёвтнема ды очерк, рецензия ды писатель ялгадо ледстнема – сон совавтсь ансяк эсь сельмсэ неезенть, эсь оймесэ онкстазенть.
Ведьгеменде ламо иеть апак лотксе, апак оймсе Александр Мартынов панжтнесь минек литературасонть од кить, казнесь ловныцятнень туртов од кеняркст.
А. К. Mapтынов чачсь Саратовской областень Петровской райононь Синенькие эрзянь велесэ, сокицянь семиясо. Стихень сёрмадомо кармась теке областень Петровск ошонь педтехникумсо тонавтнемстэ. Теде мейле А. Мартынов мельга-мельцек нолдась 30 книгат Московсо ды Саранскойсэ.
1938-це иестэ Мордовской книжной издательствасо лиссь стихень васенце книгазо «Морот счасияв эрямодо». 1940-це иестэ А. Мартыновонь «Вечкема» лем ало лиссь валморонь омбоце пусмозо. Теде башка тей совавтозельть лия раськень валморонь сёрмадыцятнень эрзянь кельс ютавтовкстнэяк.
Од вий марто гайгезевсь Мартыновонь вайгелезэ Ине Отечественной войнань пингстэяк. Те шкасто лиссть «Изнямос» (1942) ды «Изнямонь зорят» (1944) валморонь пусмотне. Сынь алтазельть тиринь масторонтень вечкемантень ды ятонь изнямонь кемемантень. Башка тарка войнань иетнестэ саи «Монь ялгам» валморонь повестес, конась прядозель 1946-це иестэ. Прявт героесь Радай Иван – те алкуксонь ломань, Советской Союзонь героесь Иван Радайкин.
Седе тов сёрмадеесь од вий марто сёрмады покш поэмат, конатнень ютксо «Галянь вечкемазо», «Ванда», «Норовжорч» ды лият.
А. К. Мартыновонь поэзиянзо марто теевить содавиксэкс седеяк ламо ловныцят. Нолдавить валморонь од пусмот рузонь кельсэяк. Вечкевиксэкс теевсть стихень ды поэмань истят сборникензэ: «Радость» (1964), «Хлебный дождь» (1971), «Жаворонок» (1972), «Светлая музыка» (1982), конат лиссть «Советский писатель» ды «Современник» издательстватнесэ. Стихензэ ютавтозь венгрань, болгаронь, украинань, эстэнь, мариень, татаронь ды лия раськень кельтнес.
1973-це иестэ А. Мартынов нолдынзе «Тетятнень киява», 1977-це иестэ – «Розень кши» романонзо.
Поэтэсь свал покш мель явсь лия кельстэ произведениянь ютавтомантень. Эрзянь кельс сон ютавтнесь А. С. Пушкинэнь, С. А. Есенинэнь, В. В. Маяковскоень ды ламо лия поэтэнь стихть ды поэмат.
Минек литературантень покш путовксонзо кис А. К. Мартынов казезь «Дружба народов» ды «Знак Почёта» ордентнэсэ, медальсэ, максозель тензэ Мордовиянь заслуженной писателень лемесь, МАССР-нь государственной ды комсомолонь премиясь.
Кулось сёрмадеесь 1989-це иень ноябрянь 30-це чистэ, калмазь Саранскойсэ.
