Национальная библиотека им. А. С. Пушкина Республики Мордовия

Меню
Меню

Юшкин Виталий Юлианович (1934–1989)

от

Эйзюрковонь 25-це чистэ топодевельть бу 90 иеть поэтэнтень, ютавтыцянтень Виталий Юлианович Юшкиннэнь. Чачсь сон Самара ошсо. Тонавтнесь Одессань мореходной училищасо, покш мелезэль теевемс морякокс. Но истя эзь лисе. 1957-це иестэ прядызе Одессань госуниверситетэнть ды теде мейле важоди геологокс, топографокс Белоруссиясо, Москов ало, Куйбышевской областьсэ. Мейле важодсь Сарансо ды Куйбышевсэ газетань ды журналонь редакциясо литсотрудникекс. 1975-це иестэ прядсь литературной прявт курсат Московсо.

«Лирические стихи» васень книгазо лиссь 1959-це иестэ Саран ошсо. Поэзиянь вечкицятне сеске редизь: чачсь од поэт – эсензэ вайгелензэ, лиянь ёнов а молиця, мазый келензэ марто. Стихензэ талновтыцят, седейс токицят, образонзо – виевть, мазыйть.

Эрьва кодат иетнестэ поэтэнть лиссть истят книганзо, кода: «Знакомый мотив» (1961), «Завязь» (1967), «После свидания» (1980), «Мой берег» (1984) ды лият. Виталий Юшкинэнь свал талновтсь ютазь пингесь, кувака стака кись, конань ютызь покштянзо-бабанзо. «Мурза Акайка» лиро-эпической поэмасонть, кона лиссь 1972-це иестэ, поэтэсь ёвтни Степан Разинэнь прявтсо крестьянской восстаниядонть, косо лия раськетнень марто вейсэ олячинь кис тюрсть эрзятне ды мокшотне. Те теманть сондензэ икеле эрзянь ды мокшонь литературасонть кепсизь лияткак, но Виталий Юшкин тень теизе седе маштозь, виевстэ. Сон домкалгавтынзе прявт геройтнень, эрзянь цёранть Мурза Акайкань ды ине аванть Алёна Арзамасскаянь образост. Поэтэнть куломадонзо мейле лисезь «Оборванная струна» (1993) книгантень совасть эрьва кодамо иестэ сёрмадозь стихензэ.

Виталий Юлианович Юшкин пек содавиксэкс теевсь рузонь кельс эрзянь ды мокшонь поэттнэнь произведенияст ютавтоманть коряс. Ютавтынзе Никул Эркаень, Илья Девинэнь, Павел Любаевень, Сергей Кинякинэнь, Иван Прончатовонь ды лиятнень стихест ды поэмаст. Тень теизе пек седейшкава.

Ламо иень перть Виталий Юшкин важодсь рузонь кельс «Масторава» эпосонть ютавтоманзо лангсо. «Масторавань» ютавтозь сонзэ вариантось лиссь куломадонзо пек седе мейле – 2009-це иестэ.

В. Ю. Юшкин 1972-це иестэ саезь СССР-нь Писателень союзонь член.

Кулось поэтэсь 1989-це иестэ, калмазь Саранскойсэ.