Юртов Авксентий Филиппович (1854–1916)

Даволковонь 20-це чистэ топодевельть бу 170 иеть эрзянь васенце просветителентень, педагогонтень, этнографонтень Авксентий Филиппович Юртовнень. 

Авксентий Юртов чачсь Уфимской губерниянь Мензелинской уездэнь Калейкина эрзянь велесэ. Ней те Татарстанонь Альметьевской район.

1872-це иестэ Юртов кармась ансяк панжовозь Казанень учителень семинариясо васенце эрзянь тонавтницякс. Каникулатнестэ сон ялго яксесь эрзянь велетнева, пурнась устной народной творчествань произведеният. Седе тов кармась семинариянть юрсо мордовской училищань тонавтыцякс.

1883-це иестэ сон сась важодеме Самара ёнксонь (ней Ульяновской областень Новомалыклинской район) Ташто Бесовка эрзянь велень школань тонавтыцякс. Те школасонть тонавтома тевенть сон аравтызе семинариянть койсэ. А. Ф. Юртов яксиль тонавтницятнень кудова, кортниль тетяст-аваст марто, пурныль эрзянь морот, ёвкст, содамоёвкст ды велень койтнень. Сон эрзянь тонавтницятнень ютксто вешнесь седе превейтнень ды кармавтсь эйсэст седе парсте тонавтнемс-содамс тиринь келенть ды культуранть. Авксентий Юртов ульнесь эрзянь велесэ тиринь кельсэ тонавтомань ушодыцякс.

1884-це иестэ А. Ф. Юртов нолдась «Букварь для мордвы-эрзи с присоединением молитв и русской азбуки» эрзянь кельсэ васенце букварь.

1877-це иестэ Казанень епархиянь «Кулятнесэ» печатави А. Ф. Юртовонь «Погребальные обряды и поверья крещеной мордвы Уфимской губернии» статьязо. Сон эрзянь кельс ютавтынзе церьковань ламо книгатнень.

1891-це иестэ Юртов примизе священникень санонть. Уфимской уездэнь Андреевка велесэ сон панжсь колмо классонь церковно-приходской школа ды мейле теевтизе сонзэ земскоекс.

Учёноесь тусь эрямосто 1916 иень маень 1-це чистэ, калмазь Андреевка велесэ.