Воинов Леонид Иванович

Леонид Иванович Воинов – композитор, балалаечник, дирижёр, МАССР-нь народнай, заслуженнай артист, РСФСР-нь искусствань заслуженнай деятель, СССР-нь композиторонь Союзонь член. Л. И. Воиновонь лемоц содаф сембе масторть келес. Сонь творчествац – оцю путфкс Мордовия республикаса профессиональнай музыкальнай творчествать тиевомаса и вииямаса, музыкальнай культураньконь касфтомаса. Леонид Ивановичень сембе эряфоц сотф музыкать мархта.

Л. И. Воинов шачсь 1898-це кизоня 12-це июньцта Темников ошса, служащаень семьяса. Музыкань шарьхкодема маштомась, мярьгат, шачсь мархтонза. Сонь аляц морсесь скрипкаса, и тя музыкань кельгомась етась и Леонидонди. Анцяк тейнза сяда кельговсь балалайкась. Сон сявондсь балалайкаса морамань урокт Петербургскяй консерваториянь студентть И. П. Пономарёвонь ширде, конац кизонь кофнень ётафнезень Темниковса. Сяльде – консультацият Московскяй консерваториянь профессорть А. Б. Гольденвейзеронь и балалайкаса лац морамати ушетксонь путыть Б. С. Трояновскяень ширде. Фалу тонафнемась макссь тейнза вии маштома виртуознай исполнительскяй техникати. Нинге тонафнемок гимназияса, Воиновонь мялецоль кочкамс музыкань кельги од ломанень оркестра.

Темниковскяй гимназиять аделамда меле 1917-це кизоня сон поступась Казанскяй университетонь историко-филологическяй факультетти, но революциянь событиятнень мархта аделамс ашезь кенерь, мрдась меки шачема вастозонза. Тяса оцю мяльса ушедсь пуроптома ошень музыкальнай оркестра и 1918-це кизонь 20-це мартста ни ульсь васенце выступленияц Темниковань эряйхнень каршек. 1918-це кизоста сявомок и сембе эряфонц пингста Л. И. Воиновонь творческяй тевонза сотфт Темниковскяй рузонь народнай инструментонь оркестрать мархта, коса сон ульсь художественай руководителькс и дирижёркс. 1930-це кизоня Темников ошу, штоба кулхцондомс оркестрать, сашендсь Московскяй консерваториянь профессорсь А. Б. Гольденвейзер, конац макссь пяк оцю питне провинциальнай музыкантнень тевснонды.

Народнай инструментонь оркестрать репертуароц пяшкотькшнесь рузонь народнай морса, миронь и рузонь классикань произведенияса. Л. И. Воиновонь переложенияса оркестрась морсезень П. Чайковскяень, М. Глинкань, Ж. Бизень, Л. Кирюковонь и лама лия авторхнень произведенияснон. Тяда башка, Л. Воинов сёрмадсь опера «Ёфкс попть и сонь работниконц Балдать колга» А. С. Пушкинонь произведениянзон коряс, сюита «Вирень сценат», 2 концертт балайканди оркестра мархта, кантата хоронди, солистонди и оркестранди «Шачема край» Н. Эркаень валонзон коряс, оркестранди фантазия мокшэрзянь темас, «Мордовскяй рапсодия», симфониетат, балалайканди и фортепиананди концертнай вариацият.

Оркестрать мархта морсесть мокшэрзянь содаф ламоц певецне: И. М. Яушев, Р. М. Беспаловась-Еремеевась, Д. И. Еремеев, М. Н. Антоновась и лиятне.

Л. И. Воинов путсь лама вий, штоба крхталгафтомс музыкальнай содамощить Темниковскяй школаса и педагогическяй училищаса, пуропнесь хорхт.

Великай Отечественнай войнать пингста Темниковскяй оркестрась арнесь и максессь концертт сембе масторть келес.

Кулось Л. И. Воинов 29-це октябрьста 1967-це кизоня Саранскяйса, а калмаф Темников ошса. Сонь лемсонза путфт мемориальнай доскат культурань Кудса и кудса, коса сон эрясь. Тяни тяса тиф мемориальнай музей музыканти. Леонид Ивановичень лемонц каннесы Темниковскяй детскяй музыкальнай школась и ошень рузонь народнай инструментонь оркестрась.

Леонид Иванович Воинов эрь тевонц тиендезе виень аф ужальдезь, кельгозь. Содаф композиторсь лама тись музыкальнай культураньконь вииямати и мазылгофтомати.

Материалсь аноклаф А. С. Пушкинонь лемса библиотекань фонттнень коряс.