Владимир Николаевич Корчеганов (1941)

Мокшэрзянь литератураса тяштихнень ёткса няевикс васта сатни мокшень асу поэтсь, Мордовиянь культурань заслуженнай работниксь Владимир Николаевич Корчеганов.

Владимир Корчеганов шачсь Ковылкинскяй райононь Садовка веленяса 1941-це кизонь 9-це мартста. Аляц, Николай Павлович, шавовсь войнаса, тядяц, Евдокия Максимовна, покодсь колхозса и касфтсь аляфтома илятф идензон эса. Васенце стихонзон поэтсь лемдезень, кода и ламоц лия поэттне, тядянцты и тонафниензонды, кит ащесть творческяй кибрясонза. Творчествань киц-яноц ушедсь 1960-це кизоня, мзярда велень цёрась сась Саранскяи одс ушеткшни поэттнень и композиторхнень васенце семинарозост.

Стихонь васенце книгац «Луганязе-лаймонязе» ульсь тяштьф ёмла шабатненди. Сон лиссь Мокшэрзянь книжнай издательстваса 1977-це кизоня. Омбоцесь – «Ожука, монць» – лиссь 1980-це кизоня. Эзонза сувасть стихт, ёфкст, азкст, повестть. И тусь, и тусь аф тёждя, вешендемада пяшксе киц сяда келиста и сяда ичкози.

Мольсь пингсь, фкя-фкянь мельге лисендсть книганза «Судьбань тяште», «Кочкаф произведеният», кассь творчестванц кельгиензон лувкссна. Кемокстась соткссь тяштить и лувить ёткса. Поэтть книганза ётафтфт рузонь, эрзянь кяльс «Друг мой», «Весна», «Штрафной удар», «Свет негасимый», «Теплота души», «Солнечный котенок», «Людские судьбы» и лиятне.

Владимир Николаевич машты аф аньцек стихонь сёрмадома, но и пяк машты стихонзон лувома. Машты морама. Ламоц стихонзон лангс композиторхне ладясть музыка. И тяни ся моротне кеняртьфнесазь ломаттнень эсь лямбошиснон и мазышиснон мархта. Творческяй васедематнень пингста пяшкотькшнесыне кулхцондыензон седиснон-ваймоснон ару мяльса-арьсемаса, машты ломанень седиса шкаень цятконянь-толнянь крьвястема.

Владимир Николаевич Корчегановонди библиотекань сотрудникне пачфтихть седиста моли лямбе валхт! Арьсихть кеме шумбраши, павазу, мани эряф.