Аштемковонь 24-це чистэ топодевельть бу 90 иеть Василий Семёнович Учайкиннэнь. Те ломанесь Мордовиясо ульнесь пек содавикс – сон хозяйственной, государственной ды политической деятель.
Чачсь-кассь Василий Учайкин эрзянь Симкина велесэ, конась ашти Покш Березникень районсо. Школань прядомадо мейле тусь тонавтнеме Ульяновскоень велень хозяйствань институтов. 1956-це иестэ прядызе ды таго сась тиринь енксов. Ютынзе карьерань весе кузтематнень. Кармась важодеме Покш Игнатовань районсо ветврачокс, мейле – райононь прявт ветврачокс. Роботась Отяжелень производственной колхозонь-совхозонь управлениянь васняяк прявтонь полавтыцякс, мейле – прявтокс. Ульнесь МАССР-нь велень хозяйствань отделэнь прявтокс, министрань полавтыцякс, Ковылкинань райононь КПСС-нь горкомонь васенце секретарекс, 1978-це иестэ саезь 1991-це иес роботась МАССР-нь Министрань Советэнь прявтокс. Кавксть пурназель депутатокс. Василий Семёнович эзь сода оймамо, лиякс сон эзь машт. Ульнесь МР-нь Прявтонть юрсо Консультативной Советэнь прявтонь полавтыцякс, МР-нь Правительствань Прявтонтень лездыцякс, 1941–1945-це иетнень войнань ды трудонь подвигень мемориальной музеень общественной Советэнь прявтокс.
Ламо иень перть парсте важодеманть кис В. С. Учайкин тешкстазель государственной покш казнетнесэ: Октябрьской Революциянь, Трудонь Якстере Знамянь ордентнэсэ, «Почётонь знаксо», «Раськетнень ояксчинь», Славань 3-це степенень ордентнэсэ ды ламо лия казнесэ. 2018-це иестэ максозель тензэ «Мордовия Республикань Почётной гражданин» лемесь.
