Торопкин Павел Кузьмич (1920–1999)

12-це июльста топоди 105 киза шачема шистонза мокшень содаф поэтти, Россиянь писателень Союзонь члентти Павел Кузьмич Торопкинонди.

Сон шачсь Атюрьевкяй аймаконь Клопинка велеса. Сисем кизоса лядсь тядяфтома-алятома.

Ашезь када цебярь седи ломаттне уроз цёранять юмама-арама. Трязь-щязь, вятезь школав, тонафтозь эряма, тевонь кельгома. А тевда Павел Кузьмич содась лама. Ульсь колхозникокс, работась термистокс Саранскяй инструментальнай заводса. Эрь тевса сондеенза сафтовсь, эрь вастса шнама ломанель.

Эсь яннянц стихонь сёрмадомати Павел Кузьмич вешендезе ламос. Мзярда потмоц вельф пяшкодсь поэзиянь ару валдта, стихонь строчкатне мадсть кагод лангс, а сяльде сувасть васенце сборникозонза, конань лемоцоль «Од толня». Сон лиссь 1958-це кизоня. Эстоньбере седиень тя толнясь коль вийнзась, псиц-эрьгац сувась лия сборникска. Улема, ламотненди содафт поэтть тяфтама книганянза, кода «Панда пряса толхт», «Клянцекска шись», «Тундань зойф».

Пингонь ётазь Павел Торопкинонь мархта васедсть рузонь лувихневок. Рузонь кяльса лиссть кочкаф лирикань и поэмань колма сборниконза: «Лесные ручейки», «Огни на горе», «Лесная застава».

Эсь творчествасонза авторсь фалу шарфнесь мяль тядянь-алянь масторти, морась колганза панжадонь седихть и оцю мяльса.

Сонць Павел Кузьмич, кода азфоль ни, тевонь содай-кельги ломань. Тяфтама ломаттнень колга стихонзовок. Поэтть сембе геройнза – сёронь видихне-касфтыхне, строительхне, пянакудонь-мезень марайхне – каннихть потмосост седиень оцю лямбоши, конань мархта эжнесазь эсь тевснон, лездыхть лиятненди сяськомс-панемс сталмотнень-ризфнень.