Аштемковонь 3-це чистэ топодевельть бу 105 иеть, экономистэнтень, прозаикентень, Ине Отечественной войнань участникентень, Россиянь Сёрмадыцянь ды военной литератераторонь вейсэндявкстнэс совицянтень, 1980 иестэ сеазь Москов ошонь мордовской землячествантень совицянтень Тимофей Назарович Тиминэнь (Митряшкинэнь). Чачсь сон Татарстанонь Бавлинской буень Дмитриевка эрзянь велесэ.
Тимофей Назарович заочна прядсь планонь-экономикань техникум. Важодсь счетоводокс, бухгалтерэкс (1933–1938). Мейле тусь армияв, косо кучозель тонавтнеме военной зенитно-пулемётной школав.
Ине Отечественной войнань иетнестэ тюрсь ятонть каршо Западной, Брянской, Центральной, Белорусской фронтнэсэ. Ветексть ранязель, казезь зярыя орденсэ ды медальсэ.
Войнадо мейле тонавтнесь Госпланонь академиясо (1947–1950), Общественной наукань университетсэ (1950–1953). Колоньгеменде ламо иеть важодсь зярыя министерствасо экономикань ды финансонь прявт специалистэкс.
Тимофей Назарович Тимин совавтозь Россиянь Сёрмадыцянь вейсэндявксос. Сонзэ лиссть 30 ламо книганзо: «Москва за нами» (1968), «Капитан из Воегурта» (1971), «За три шага до победы» (1987), «Инзенская революционная» (1993), «Артур Моро: жизнь и творчество» (1995), «Сказки на злобу дня» (2001), «Москва в опасности» (2004), «Боль и гордость» (2005), «Русская эрзянка» (2005), «Обломки-1» (2006), «Обломки-2» (2006), «Вещун» (2006), «Гены Сципионов» (2006), «Песни над Волгой» (2007), «Закон возмездия» (2008) ды лият. Теде башка, произведениянзо печатавсть 20 ламо вейсэнь сборниксэ, журналсо, газетасо.
Т. Н. Тимин кулось 2012-це иень умарьковонь 30-це чистэ.
