Мокшень содаф писательсь Тимофей Андреевич Кирдяшкин сась мокшэрзянь литературав 50-це кизотнень, и лувись сонь содасы кода «Кели Мокша» романонь автор. Аф ваномок сянь лангс, што писательсь нолдась аньцек фкя произведения, сон тиевсь содавиксокс, сяс мес макссь афкуксонь художественнай исследования, видеста и вииста няфтезе мокшэрзянь народть ся пингонь эряфонц.
Т. А. Кирдяшкин шачсь 21-це февральста 1888-це кизоня Ковылкина аймаконь Сире Маманя мокшень велеса ашу семьяса.
Сон ётазень васенце мировой войнань китнень. Октябрьскяй революциять сяськомда меле кочкафоль Краснослободскяй уездонь Сире Озязть исполкомонцты председателькс.
Гражданскяй войнань кизотнень полконь комиссарсь Т. А. Кирдяшкин тюрсь Юденичень и белополякнень каршес Западнай фронтса, а войнать аделамда меле тейнза савсь покодемс велень хозяйствань оргаттнень эса Краснослободскяйса, Пензаса, Саранск ошса и, мекпяли, Москуса − Вирень хозяйствань министерстваса. Сон аделазе вирень Брянскяй институтть.
Писательсь лама няйсь, сядонга лама марясь седисонза. Сяс кемонь кизода лама сёрмадсь «Кели Мокша» романонц эса. Произведениять содержаниянц юрс сявфт ся афкуксонь эряфонь тефне, конатнень эса участвондась сонць авторсь, и ся ломаттне, конатнень мархта эрясь и васьфнесь кибрясонза. Фкя сёрмасонза Т. А. Кирдяшкин тяштсь: «Романца няфтьф эряфонь тефне сявфт аф монь прястон, а ся эряфста, кона ётась монь сельминголен и коса улень монць». Виде, романть сёрмадоманцты лама макссь писательть эсь эряфоц, Сире Маманяста и Мокша ляйть маласа ащи велень ломаттнень (ламонцне эздост арасть геройнзонды прототипокс) эряфснон лац содамасна.
«Кели Мокшеть» сёрмадомань историяц оцю и кувака. Материалонь кочкама авторсь ушедсь нинге Великай Отечественнай войнада инголе. Сёрмадома ушедсь войнать васенце кизостонза и аньцек 1952-це кизоня писательсь кандозе романонц «Сяськома» журналу, коса и печатлафтольхть эздонза пакшт. 1953-це кизоня «Кели Мокшесь» нолдафоль башка книгакс, 1955-це кизоня лиссь рузкс Саранскяйса, а вете кизода меле нолдазе Москувонь «Советская Россия» издательствась.
Писательсь сёрматкшнесь азкстка. Инь удалафсь эздост − «Тядя» азкссь, кона лиссь 1963-це кизоня.
Тимофей Андреевич Кирдяшкин ётась эряфонь крхка ки.
Кулось 1972-це кизоня Москуса.
