Степан Семёнович Кондурушкин (1874–1919)

Мокшэрзянь литературать историясонза Степан Кондурушкинонь лемоц лама кизос ёрдафоль литератураста. Сонь колганза ламось тянемс лядсь аф содафокс. И тячи нинге аш кода азомс – мокша или эрзя сон ульсь, кода повсь Сибири и тозк 1919-це кизоня кулось. Мокшэрзянь лувихне васенцеда сонь колганза кой-мезе ушедсть содама 1992-це кизоня, мзярда ся кизонь «Мокша» журналть 2–3-це номерсонза печатлафоль Москувонь литераторхнень Георгий и Леонид Миронофнень «Стака крёз» статьясна, конань эса нюрьхкяняста азондовсь Кондурушкинонь эряфонц и творчестванц колга.

Степан Семенович Кондурушкин шачсь 1874-це кизонь январь ковста Самарскяй губерниянь Студенецкяй волостень Липовка велеса мокшэрзянь ашу семьяса.

Революцияда ингольдень мокшэрзятнень ёткса сон ульсь тонафнеф ломанькс: 1893-це кизоня Николаевск ошса аделась гимназия, а 1898-це кизоня – Казань ошень учительскяй институт, конань аделамда меле Кондурушкинонь кучезь работама Ближняй Востоку – Сирияв и Палестинав. Тоса сон покодсь учителькс, рузонь Православнай миссияса – школьнай инспекторкс, сёрмас-грамотас тонафнесь арабонь и рузонь шабатнень. Вете кизода меле 1903-це кизоня мрдась Россияв, кеветие киза эрясь Петербургса. Сирияста мрдамда меле Кондурушкин ульсь Турцияса, Китайса, Сибирьса, Новая Земля островса. Ся пингонь эсь эряфонц сонць писательсь лемнезе «Шкаень мирть-масторть эзга видешинь вешендемакс». «На выборах» очерксонза, кона печатлафоль В. Г. Короленко писательть лезксонц вельде «Русское богатство» журналть 1907-це кизонь 3-це номерсонза, Степан Семёнович Кондурушкин сёрмадсь: «Нужась, вачашись, тонафнемати прафтомась монь и монь кондяпнень Россиять розаряф‑тапаряф велензон эзда тердемазь «Шкаень масторть эзга якама». Велесь тя пингть сюволясь мода потмоса, эрясь вачашинь и кельмошинь нужа потмоса, но сякокс тиезе семботь сянди, штоба хоть кой-кона велень шабатненди удалаль тонафнемс. И вов тяни, бта стака онцта стямда меле, велесь терди эсонок меки, штоба минь эсь содамошиньконь педа-пес максолеськ сондейнза».

Кода рузкс сёрмады писатель-реалист С. Кондурушкин кармась лац содавома Россияса 1902-це кизоста ушедозь. Эста «Русское богатство» журналса васенцеда печатлафтольхть «Скитания по Сирии» цикласта сонь кой-кона азксонза. Сяда меле сяка жа журналса и «Современное слово» газетаса фкя-фкянь мельге ушедсть лисендема рассказонза, очерконза, публицистическяй статьянза и башка книганза: «Звонарь» (1914), «В солнечную полночь» (1916), «Потомки царя иудейского» (1917), «Публика», «Футуристы», «Вслед за войной. Очерки великой европейской войны» (1915), «Наяву», «Учительница Немакина», «Сибирские рассказы» (1916), «Половодье. Очерки первых дней переворота» (1917). Революцияда ингольдень Петербургса кафксть нолявсть Степан Кондурушкинонь «Сирийскяй азксонза» (1908 и 1910), «Забастовка» (1906), «Моисей» (1908), «Монах» (1917) повестенза.

Башка васта С. С. Кондурушкинонь творчествасонза занци «Забастовка» повестсь, кона васенцеда печатлафоль 1906-це кизоня «Божий мир» журналса. Тя повестсь шарфни эсь лангозонза мяль, васендакиге сяс, мес сонь эсонза няфтьф событиятне няйфт эсь сельмоса. Произведениять главнай героец Пётр Николаевич Кропотов – тя сонць Кондурушкин, лиякс мярьгомс, повестть сюжетоц лама ширде автобиографическяй. Произведениясь сувафтф «Мокшэрзянь литературань антологияти», и лувихненди сон максы башка содамошит аф аньцек ся пингть, но и сонцень писательть идейнай и эстетическяй вешфксонзон-арьсеманзон колга. Лувомок Степан Семёнович Кондурушкинонь произведениянзон, содави и шарьхкодеви, што сон ульсь цебярь писатель, публицист и эсь лацонь философ.