Ацамковонь 15-це чистэ топодевельть бу 100 иеть хоккеистэнтень, футболистэнтень, заслуженной мастер спортантень, олимпийской чемпиононтень Виктор Григорьевич Шуваловнень. Чачсь сон Наборные Сыреси велесэ, ней МР-нь Отяжбуе ёнксось, сокицянь-видицянь семиясо. Прядсь физической культурань Московонь государственной университет (1964), седе тов важодсь слесарекс Челябинской тракторной заводсо. Налксесь шайба марто хоккейсэ, те – Челябинск ошонь «Дзержинск», военно-воздушной вийтнень, Советской армиянь Центральной Кудонь командатнесэ.
1954-57-це иетнестэ Виктор Шувалов – СССР-нь сборнойсэ. Олимпийской чемпион (1956), мирэнь чемпион (1955-56), Европань (1954-56), СССР-нь (1951-53, 1955-56).
1957-це иестэ саезь – Московонь военной округонь армиянь «Кристалл – Электросталь», 1960-63 – «Спартак», 1967 – «Химик» спортивной клубтнень тренер, 1968-93 – «Спартак» обществань учебной пельксэнь заведующей (Москов ош).
1963-66-це иетнестэ – хоккеень коряс Румыниянь сборноень тренер.
В. Г. Шувалов казезь «Знак Почёта», Народтнэнь Ояксчинь ордентнэсэ.
Виктор Григорьевич сакшнось Отяжбуев, ютавтнесь мастер-класст спортсментнэнь туртов. Тесэ ютавневить футболонь ды хоккеень коряс турнирт спортсменэнть призэнзэ кисэ, лемезэнзэ панжозь «Ледовый дворец им. В. Г. Шувалова».
