Сергей Степанович Ларионов (1908–1991)

Мордовиянь заслуженнай писательть Сергей Степанович Ларионовонь лемоц лац содаф мокшэрзянь литератураса.

Шачсь С. Ларионов тюжяковонь 6-це шиста 1908-це кизоня Зубово-Поляна аймаконь Анаю мокшень велеса, сокаень-видиень ашу оцю семьяса.

1925-це кизоня ушедсь тонафнема Саранск ошень педучилищаса, аделамок конань, мрдась шачема велезонза. Покодсь велень Советонь секретарькс, сяда тов – колхозонь председателькс. 1931-це кизоня сявфоль служама Якстерь армияв. Тяса Сергей Степанович васенцеда варжазень эсь виензон литератураса. Ся пингста и сотовсь эряфоц печатть мархта.

Великай Отечественнай войнать васенце шистонза сон ульсь фронтса. Казьф аф фкя правительственнай казнеса.

Войнада меле С. Ларионов аделазе Мордовскяй пединститутть. Покодсь райисполкомонь председателькс, Кинофикациянь управлениянь начальникокс. Ульсь Мордовскяй книжнай издательстваса директоркс, МАССР-нь писателень Союзса ответственнай секретарькс.

Оцю ки етась Сергей Степанович Ларионов и эряфонь кочкаф материалсь аназь-анась пря кагодти. Сон тяштсь и сядонгольть, и тячить квалма. Ушедсь азксста, сяльде етась повесттненди и роматтненди. Писательть главнай героец – простой ломанць, кона кемоста сотф народть мархта, касы народть еткса и тюри сонь павазу эряфонц инкса.

1954-це кизоня «Сяськома» альманахса печатлафоль «Лектор» азксоц, конац сувась мокшэрзянь инь цебярь азкснень ёткс. Пара мяльса васьфтезь лувихне Ларионовонь «Архип атянь елкац», «Вирь мацихть» азксонзон. Седис сувай Архип атянь образоц, кона эряфонь аф ужяльдезь тюрсь фашисттнень каршес. Тя азксь ламоксть лисендсь Мордовияса и Москуса. 1959-це кизоня печатлафоль «Настя» повестец, кона васенцеда лиссь Саранскяйса, а 1961-це кизоня – «Молодая гвардия» издательстваса «Совесть» лем ала. Произведенияса авторсь лац няфнесыне од мирттнень-рьватнень еткса соткснень. «Колма вармат» повестенц эса азондовихть колхознай велеть афсатыксонза, од и сире койхнень еткса тюремась, няфневихть оцю тефт, ломанень кеме характерхт. С. Ларионовонь творчестваса оцю васта занци «Лямбе кядьса» романоц. Авторсь кепси кафта оцю прябалат: марстонь и семейнай эрямась-ашемась.

Мекольдень кизотнень нолдафт писательть книганзон: «Шачень-касонь», «На берегах полноводной Сивини», «Фкя шинь бойста», «Хрусталень пайкт». С. С. Ларионов васенцекс мокшэрзянь литератураса «Хрусталень пайкт» романцонза крхкаста няфтезе Мордовияса промышленность касоманц, Саранскяйть оцю индустриальнай центракс араманц.

 Сергей Степанович Ларионовонь творчествац – оцю путкс мокшэрзянь культурати. Сонь произведениянза морафневихть и тонафневихть школаса и вузса, максыхть оцю лезкс лувихненди, сембонди, кить кельгсазь мокшэрзянь литературань.