Те иестэнть топодевель бу 115 иеть эрзянь сёрмадеентень, ютавтыцянтень Сергей Андреевич Салдиннэнь. Вана кода сонсь авторось сёрмады эсензэ ланга: «Мон чачинь эрзя велес – Кшуманцяс (Вольской округ). Тетян-аван середнякт-крестьянт. Кода топодсть 14 иень (1922 иестэ) туинь Чардымев вельхозкоммунав. Мейс? Тонавтнеме, эрямо.
Аволь веселаль эрямось. Вачо иесь ансяк ютась – кши аламо. Шабра велень сокицятне коммунанть эзизь вечке. Мейле аламодо тевесь тусь. Од коммунартнэнь эйсэ кармасть тонавтомо велень хозяйствань тевс. Монгак тонавтнинь од тевентень.
1923-це иестэ туинь Саратовонь профтехшколав. Кавто иеть тонавтнинь агрономонь отделениясо. Мейле ве теле тонавтнинь землемеркс. 1928-це иестэ прядыя Московонь губпартшколанть. Роботынь «Якстере тештень» редакциянь секретарькс.
Васень ёвтнемам «Липни тол» ульнесь печатазь газетасо 1926-це иестэ. Сермадан чуросто».
С. Салдин ламо ёвтнеманзо алтынзе эйкакштнэнень, те «Летчик» ды «Михеень онозо» произведениятне. Ится жо «Кандра», «Черькст», «Якстере цецят» ды лият, конатне совасть мельга мельцек лисезь кавто сборникезэнзэ: «Васень эскелькст» (1932) ды «Кандра» (1934).
Авторонть ёвтнемань келезэ сюпав, образной, ламо весела, пейдевтиця таркат, згилямкат. Юморось – сонзэ келень аявовикс пелькс.
«Якстере цецят» евтнемась моли художественной очерк ёнов. Тесэ весе пейзажось лекси кенярксов ёжосо, ванькс мазычисэ, кона сови ёвтницянть-артыцянть оймес тантейстэ гайгиця музыкакс.
«Кандра» ёвтнемасонть авторось ёвтни веледе, сонзэ ломантнеде сынст тевтнеде. С. Салдин зярдояк эзь ёмавтне тиринь велензэ марто сюлмотнень, те пек парсте неяви «Кавто вайгельть» ёвтнемасонть.
Авторонть произведениянзо ванстовить МР-нь А. С. Пушкинэнь лемсэ Раськень библиотекань фондсо.
