Панжиковонь 17-чистэ топодевельть бу 65 иеть эрзянь журналистэнтень, прозаикентень Седойкин Леонид Павловичнэнь.
Чачсь сон Дубёнкань буень Кобалесэ. Прядызе Н. П. Огарёв лемсэ МГУ-нь филологиянь факультетэнть. Важодсь рузонь келень ды литературань тонавтыцякс Отяжбуень Сырезелень школасо. Мейле колмо иеть тонавтсь немецень кельс Архангельской областень Плесецкой буень Вершинина велень школасо. 1988–1991-це иетнестэ «Чилисема» эйкакшонь журналонь литературной сотрудникель. 1991–1993-це иетнестэ «Сятко» журналонь ответственной секретарель. Теде мейле кото иеть ветясь рузонь литература ды эрзянь кель Оренбург ёнксонь Бугурусланонь педколледжсэ.
Зярдо велявтсь эсензэ велев, сестэяк эзизе сезе литературанть марто сюлмавксонть. Эсест ёнкссо ветясь литературань кужине, косто сеедьстэ пачтиль Саранскоев од сёрмадыцянь семинарс од тештинень.
Леонид Павловичень лиссть ансяк кавто книганзо – «Авань моронзо» ды «Эрямо».
«Авань моронзо» (1991) – сёрмадеенть васенце книгазо. Сонзэ эйсэ пачтясь эрзятнень велень эрямо койтнеде, обуцянь башка ёнкстнэде, келень мазычиденть. Ёвтнематне, прок эрьгинеть, сюлмазь нурька ёвтнемань пусмос.
2008-це иестэ лиссь «Эрямо» книгазо. Те книгантень совасть Седойкинэнь произведениянзо, конатнесэ неяви тиринь раськенть седикелень ды неень шкань велесэ эрямось.
Прозаикесь башка мель яви видечинь койтненень. Эсь юморонь ды сатирань сёрмадовкстнэсэ лангс таргси берянь тевтнень, пеедькшни седей кельмевкс ды раужо ойме ломантнень лангсо.
Тусь эрямосто Леонид Павлович Седойкин чадыковонь 21-це чистэ 2022-це иестэ.
Эрзянь прозань вечкицятнень ды ловныцятнень седейс свалшкань ледстнемакс сёрмадейденть кадовсть сонзэ книганзо.
