Чадыковонь 15-це чистэ топодевельть бу 130 иеть общественной деятелентень, лингвистэнтень, педагогонтень, эрзянь васенце профессоронтень А. П. Рябовнень. Чачсь сон 1894-це иестэ Мордовиянь Ицялонь райононь Ламбаське эрзянь велень сокицянь-видицянь кажов семиясо. Ушодкс школанть прядомадо мейле сон зярс-бути тонавтнесь Починкань духовной училищасо (ней – Нижегородской область). Тонавтнемась цёрыненть мельс эзь тукшно. 1912-це иестэ сон кадсы училищанть. Теке иень сёксня Анатолий кармась тонавтнеме Нежин ошонь (Украина) пединститутонь филологиянь факультетсэ. Тонавтнесь пек парсте, домка содамочить таштась латинэнь, англань, финнэнь, эстононь ды лия кельтнень коряс.
Пединститутонть прядомадо мейле, 1917–1922-це иетнестэ, А. П. Рябов важоди тонавтыцякс Омскоень учителень семинариясо ды педагогикань техникумсо. 1922–1924-це иетнестэ сон роботась Нижней Новгородсо, губерниянь народной образованиянь отделсэ. Сестэ Анатолий Павлович ютынзе тосонь эрзянь ды мокшонь велетнень, лездась панжомс од школат, конатнесэ тонавтсть тиринь кель, макссь тенст покш лезкс. Теде башка, Анатолий Павлович лездась нолдамс мокшонь ды эрзянь школатнень туртов тонавтнема книгат, «Якстере теште», «Од эрямо», «Од веле», «Якстере сокиця» газетатнень, явсь мель од педагогонь ды писателень анокстамонтень.
Московсо А. П. Рябов сеедьстэ вастневсь уш се шкастонть эрзянь содавикс сёрмадыцятнень Ф. Чесноков, Я. Григошин, П. Глухов, А. Моро, А. Лукьянов марто. Оякс тензэ теевкшнесь ине скульпторось С. Д. Эрьзя.
1924-це иестэ А. П. Рябов тердезель методистэкс РСФСР-нь Наркомпросонь вишка раськетнень советс. Тесэ сон М. Е. Евсевьев, Ф. Ф. Советкин, Г. К. Ульянов ды лиятнень марто вейсэ ютавтсь эрзянь ды мокшонь келень тонавтыцянь зярыя промкст, семинарт, вастовомат. Пек ламо оймевий сон путсь эрзянь ды мокшонь тонавтыцятнень I ды II съездтнэнь (1924–1925-це иетне) пурнамсто ды ютавтомсто.
1933-це иестэ саезь Анатолий Павлович – Мордовской пединститутонь мокшэрзянь кельтнень ды литературань кафедрань заведующей, Мордовской АССР-нь ЦИК-нь Мордовской культурань научно-исследовательской институтонь (мейле – Мордовской АССР-нь Министрань Советэнь келень, литературань, историянь ды экономикань научно-исследовательской институт, ней – НИИГН) научной сотрудник, прявт. Теке жо иестэнть эйзюрковсто Саранскойсэ ютавтозель келень коряс васенце конференция, конасонть ваннозельть грамматикань ды орфографиянь кевкстематне. Омбоце (1934-це иень) ды колмоце (1935-це иень) конференциятне ванкшнызь терминологиянь, синтаксисэнь ды грамматикань кевкстематнень. Пленарной заседаниятнесэ малав весе докладтнэнь теинзе А. П. Рябов
1934-це иень апрелень 11-це чистэ Наркомпросонь Высшей Аттестационной Комиссиясь макссь А. П. Рябовнень профессоронь лем. Сонзэ мелензэ-бажамонзо коряс научно-исследовательской институтсо панжозель аспирантура. Аспиранттнэнень лездась сонсь профессорось.
Теде мейле, Рябов профессорось седеяк покш мельсэ кармась тонавтнеме келенть. Сон васецекс макссь синтаксической виде система, кона домкасто невти эрзянь келень предложениянть структуранзо. Парсте чарькодизе: келесь кеместэ сюлмавозь раськенть историянзо марто.
Анатолий Павлович пек вечкелизе раськензэ, тиринь келензэ, эрзянь устной творчестванть, свал ульнесь ломань ютксо. Сон пек ламос бажиця учёноель, парсте содылизе эрзянь келенть ды вейсэнь языкознаниянь вешематнень, сёрмадсь эрзятнень лезэс домка ды пек эрявикс исследованият.
Медьковнь 5-це чистэ 1937-це иестэ МАССР-нь внутренней тевень наркомось сёрмадсть сонзэ арестовамс ордер. 1938-це панжиковонь 23-чистэ СССР-нь Верховной судонь Выездной Коллегиясь судизе А. П. Рябовонь ледемас. Теке жо чистэнть судонь кармавтомась топавтозель.
1956-це иень сундерьковонь 28-це чистэ СССР-нь Верховной судонь Коллегиясь А. П. Рябовдо тевенть (чумонь аразде) лоткавтызь.
Эрямонь а шожда ды нурька ки ютась эрзянь покш учёноесь Анатолий Павлович Рябов. Ялатеке эсь 44 иетнень перть сон кенерсь тееме раськензэ туртов аволь аламо паро. Пек превей ломанекс улезь, весе содамочинзэ, виензэ сон путынзе эрзятнень культураст кастомантень-виевгавтомантень.
