Государственнай премиянь лауреатсь, МР-нь народнай поэтсь, сембонди содаф мокшень ломанць Раиса Константиновна Орловась тя кизоть тяштькстсы эсь юбилеенц.
Сон шачсь тюжяковонь 13-це шиста 1963-це кизоня Сире-Шайгав аймаконь Сарга мокшень велеса, оцю семьяса.
Эсь эряфонь кинц ушедозе шачема-касома велесонза школаса покодезь: васенда ульсь школаса тонафтыкс, сяда тов сельсоветонь секретарькс, меле кота кизот – председателькс, а сяльде тусь эряма Саранскяи. Покодсь «Мокшень правдаса», «Якстерь тяштеня» журналса, 2003-це кизоста сявомок «Мокша» журналса вятьсы поэзиянь отделть, вешенди од тяштихть и лезды ушедыхненди.
Р. К. Орловась 1998-це кизоня примаф Россиянь писателень Союзу. Поэтть лиссть стихонь кеветие сборниконза: «Аран тяштенякс» (1997), «Пизелонь каштаз»(2006), «Инксот эрян» (2007), «Цёнгат» (2008), эстононь кяльса «Кулемасть, Шкайават, моньге авать» (2010), «Пацят» (2011), «Тундань ёфкс» (2011), «Крьвястян штатол» (2010), кона лиссь Йошкар-Оласа мокшень, мариень, удмуртонь, коми кяльса, «Письма странницы» (2014), «Сорга» (2014), «Мокшанская азбука» в стихах (2015), «Кись толти» (2019), «Ладимир и Азарина» сказка в стихах (2021), «Жажда откровения» (2021), «Азбукась стихса» (2023).
Р. Орловать стихонза лисендихть лама марстонь сборникова, лия масторга, ётафневихть финнонь, венгрань, эстононь, английскяй, коми, мариень, удмуртонь и лия кяльхненди.
Сон тяшти мокшень тяниень пингонь эстраднай морот, а тяфта жа морот Национальнай драматическяй театрань спектакольхненди.
Р. К. Орловась казьф Мордовия Республикань Главать лемста Литературнай премияса, Мордовиянь Государственнай Собраниянь, Правительствань, национальнай политикать коряс Государственнай комитетть Почётнай грамотасост. Аф весть арсесь «Литературная Финно-Угрия» финно-угорскяй книгань Межрегиональнай фестивалень лауреатокс. 2023-це кизоня тейнза макссть «Народный поэт Республики Мордовия» почётнай лем.
Мокшень поэтть фалу панжада потмоширец кода шабатненди, стане и эряфкшу ломаттненди. Лама лезды библиотекань покодихненди аф аньцек Мордовияса, но и лия региоттнень эзга.
Рая Орловать мялень салай стихонза сувайхть лувить ваймос. Синь кеняртьфтихть, пичефтихть, арьсефтихть, эряйхть!
