Краеведениянь кулят «Шкась. Тевтне. Ломантне»
Пётр Яковлевич Бардин
(1934–1989)
Ожоковонь 17-це чистэ топодевельть бу 90 иеть эрзянь содавикс поэтэнтень, журналистэнтень, литературоведэнтень филологической наукань кандидатонтень Пётр Яковлевич Бардиннэнь.
Чачсь сон Мордовия Республикань Кочкурбуень Пакся Тавла велесэ.
Армиясо служамодо мейле прядынзе Рязанень совпартшколанть, Н. П. Огарёв лемсэ МГУ-нь филологиянь факультетэнть. Мейле важодсь «Эрзянь правда» газетань корреспондентэкс, «Сятко» журналонь прозань отделэнь редакторокс, келень, литературань, историянь ды экономикань, научно-исследовательской институтонь старшей научной сотрудникекс. Эрзянь литературанть коряс сёрмадсь наукань кандидатонь диссертация.
Поэзияс кизэ ушодовсь школасо тонавтнемстэ. Тензэ ульнесть ансяк кемготово иеть, зярдо «Изнямо» альманахсо (1951-це иестэ) печатазель «Ливтяк, мирэнь нармунь!» васенце стихотворениязо. Поэтической произведениянзо ламоксть лиснесть «Эрзянь правда» газетасо, «Сятко» журналсо, совасть вейсэнь зярыя сборникс. 1969-це иестэ Мордкизсэ лиссь «Седей валт» стихень васенце книгазо.
Эрзянь литературасо неявикс тешкс П. Я. Бардин кадсь кода баснянь ды пародиянь сёрмадыця. Сон вечксь пеедькшнеме-згилямо, васняяк – эсензэ лангсо. Те аволь весенень максови эрямосонть, секскак ёжомарямонть Пётр Яковлевич кандызе ламо эсь сёрмадовкстнэскак. Ловныцятненень вечкевсть ды вечкевить сонзэ фельетонтнэ, баснятне, пародиятие. Сынь совасть «Горниповт ды палакст» книгазонзо, кона лиссь Мордкизсэ 1985-це иестэ.
Кулось П. Я. Бардин пек одсто Уфа ошсо 1989-це иень январень 13-це чистэ. Калмазь Пакся Тавла тиринь велензэ калмазырьсэ.
Пётр Бардиннэнь эзь панжово келес сёрмадомань виезэ, педе-пес эзь ёвтаво наукасо валозо, ялатеке эрзянь литературасо сонзэ лемезэ ашти неявикс таркасо.
