Платонов Сергей Захарович (1915–1986) - Национальная библиотека им. А. С. Пушкина Республики Мордовия

Аштемковонь 26-це чистэ 110 иеть топодевельть бу эрзянь поэтэнтень, прозаикентень, журналистэнтень, СССР-нь Вейсэндявксонтень совицянтень Сергей Захарович Платоновнень. Чачсь сон Пензань губерниянь Шемышеень уездэнь Сосновка велесэ, сокицянь-видицянь семиясо. Важодсь кудоютксо, паксясо, тонавтнесь школасо.

Саратовань областень Петровск ошонь педтехникумонть прядомадо мейле, кучозель важодеме Петровскоень райононь Каргалейка велень ушодкс школав. 1933-це иестэ тердизь Саранскоев од ломанень «Ленинэнь киява» газетань редакцияв. Те газетась сестэ ансяк панжовкшнось, тензэ эрявсть паро сёрмадыцят; Сергей Платонов се шкантень прянзо те тевсэнть уш невтекшнизе: сёрмадсь стихть, 1929-це иестэ «Якстере теште» газетасо (Москов) лиссь «Чокшне» поэмазо.

Ансяк ниле иеть кенерсь С. З. Платонов «Ленинэнь киява» газетасо важодеме, 1937-це иестэ чумовтомо ульнесь пекстазь сисем иес. Саранскоев велявстсь ансяк 1944-це иестэ. Васня важодсь «Эрзянь коммуна» газетань редакциясо, мейле ютась Мордовиянь книгань издательствав. Сёрмадсь сонсь, витнесь лиянь сёрмадовкст. Пурнызе литературань-художествань «Изнямо» альманахонь васенце номерэнть (1946). Ды зярдо эсензэ сёрмадовксонзо эйстэяк пурнавсь вадря-паро книга, 1957-це иестэ нолдызе сонзэ «Вийс совамо» лементь ало. Тезэнь совавтынзе се шкань сехте вадря стихотворениянзо ды поэманзо. Мейле лиссть истямо произведениянь зярыя пусмонзо: «Поэмат» (1959), «Монь вечкемам» (1960), «Жойниця зорят» (1970), «Звенящие зори» (1973; рузонь кельс ютавтыцясь И. Пиняев), «Маней кужо» (1985). Вете книгат нолдась прозасо – ёвтнемат ды повестть: «Эрямос совамо» (1965), «Кить-янт» (1965), «Ёвтнемат» (1967), «Васенце вечкема» (1971), «Валдо васолкст» (1975).

Сергей Платонов шкинеманзо алтызе чачома масторонзо лемс ды ледстнесь эйсэнзэ седейшкавань лембе валсо. Ульнесь эсь шкань ломань, кона, уцяскань стака вачкодькстнэнь лангс апак вано, кадновсь эсь Родинань эйдекс, весе оймесэ вечксь тиринь моданть. Сон морась седе, мезесь тензэ малавиксэль, питнеель, мезенть ловсь тиринь авань кондямокс.

Прозасо ды поэзиясо сёрмадомадо башка, Платонов терявтнесь виензэ драматургиясояк. Сонзэ перанзо алдо лиссть «Миллионерт» (1951) ды «Гараевень честезэ» (1957) пьесатне, конатнесэ вети кортамонть од шкань ломанень кастомадо. Истяжо ютавтнесь эрзянь кельс рузонь ды мокшонь сёрмадейтнень произведенияст.

Кулось С. З. Платонов 1986-це иень панжиковонь 20-це чистэ.