Петров Михаил Трофимовиченди – 100 киза

Историксь, прозаиксь, журналистсь, Мордовия Республикань народнай писательсь (1995), МАССР-нь заслуженнай писательсь (1984), МР-нь Государственнай премиянь лауреатсь (1996), Россиянь писателень Союзонь членць (1975), Великай Отечественнай войнань участниксь Михаил Трофимович Петров (1924–2013) шачсь 1924-це кизонь 19-це ноябрьста, сокаень-видиень семьяса. Образованияс коре ульсь историк.

Аделазень Пензенскяй лесотехническяй техникумть (1942), А. И. Полежаевонь лемса МГПИ-ть (1951). 1954–1962-це кизотнень покодсь «Советскяй Мордовия» газетаса. Газетаса покодемась, лама ломань мархта васетькшнематне, седи ваксстонь корхнематне козякофтозь М. Петровонь эряфонь содамошинзон. Тяштемань тевсь тонафтсь авторть эса ломаттнень потмоширеснон, прябаласнон шарьхкодема. Васень очерконза, азксонза, фельетононза салсезь лувить мяленц. Синь эсост ульсь эряфонь вий, афкуксонь видеши.

Эряви азомс, што писательсь сёрмадсь рузонь кяльса, тя корхтай мокшэрзянь и рузонь нароттнень ёткса ялгаксшинь соткснень кемошиснон, фкя-фкянь лац шарьхкодемать и ладямать колга.

Пяк маштозь и козя кяльса сон азонды лувиензонды эсь мялензон-арьсеманзон аф юкстави стака пинкнень ланга.

Васенце повестец лемтьфоль «А было так…», кона лиссь 1963-це кизоня, сяда тов тяштсь повесть иттненди «Железное солнце» (1974).

Писательть эряфста лама мезе сувась творчествазонза. Кода историк, сон произведениянзон эса ванондсы мокшэрзянь ломаттнень ингольдень пингонь историяснон, сяс тевс нолнесь лама эрявикс документ. Тя цебярьста няеви лувити «Ухтомский» (1967) документальнай повестьста, кона 1972-це кизоня нолдафоль омбоцеда «Великие месяцы» лем ала.

Сизьгемонце кизотнень песта – кафксогемонце кизотнень ушетксста лиссть М. Т. Петровонь «Румянцев-Задунайский» (кафта книгаса) и «Боярин Российского флота» романонза. Рузонь полководецнень биографиясна сотфт мокшэрзянь крайть историянц мархта и арасть национальнай геройкс аф аньцек русненди, но и мокшэрзятненди.

«Румянцев-Задунайский» и «Боярин Российского флота» М. Петровонь романонза – оцю сатфкс аф аньцек мокшэрзянь, но и национальнай советскяй литератураса.

М. Петров ушедозе сёрмадомань кинц мокшэрзянь народть историяста башка фактонь няфтемаста и пачкодсь марнек Россиянь и масторлангонь историянь тефнень ванондомаснонды. Вяри куцемань тя киса од сатфксокс арась «Красный колосс» романць, конань эса сон азонды 2-це мировой войнань тефнень колга.

Национальнай историянь кизефкенень писательсь кепсесыне «Алёна Арзамасская» романца (1991).

М. Т. Петровонь произведениянза тонафтыхть сембе масторлангть кельгоманцты и ванфтоманцты, сонь коензон-обуцянзон кемокстамаснонды.