Ожоковонь 29-це чистэ 100 иеть топодевельть бу педагогонтень Нина Фёдоровна Госткинанень (Абрамованень). Чачсь сон Мордовия Республикань Отяжбуе ёнксонь Пилезеле велесэ, тонавтыцянь семиясо.
1940-це иестэ прядызе Козловкань педагогической училищанть, 1949-це иестэ – A. И. Полежаев лемсэ МГПИ-нть.
1940-45 иетнестэ Нина Фёдоровна ульнесь Козловка ёнксонь Андреевка велень аволь полной средней школань тонавтыця; 1949-50 – МГПИ-нь педагогикань кафедрань доцент; 1950-77 – педагогической училищань, средней школань (Отяжбуень ёнксонь Козловка велень), Орданьбуень ёнксонь Луньгань 8 иень, Саранск ошонь Октябрьской райононь Луховкань средней школань рузонь келень ды литературань тонавтыця.
Нина Фёдоровна тонавтсь ды нолдась эрямонь кинть лангс пек ламо ломанть. Эсь уроктнесэ сон бажась, штобу седе парсте чарькодевлизь ды содавлизь рузонь келенть эрзянь эйкакштне. Сон ветясь дополнительной урокт, аволь классо мероприятият. Совавтсь педагогикань тевентень од ёнкст. Теке шкастонть, Нина Фёдоровна сёрмадокшнось «Методы активизации умственной деятельности учащихся на уроках русского языка» статья. Сонзэ паро мельсэ вастызь республикань тонавтыцятне, ёвтасть тензэ ламо сюкпрят.
Нина Фёдоровнань парсте важодемазо тешктазель ламо шнамонь конёвсо. Ульнесь казезь Ленинэнь орденсэ, медальсэ. 1965-це иестэ саезь сон – МАССР-нь заслуженной учитель, 1968-це иестэ Н. Ф. Госткинанень максозель Социалистической Трудонь Героень лемесь. Истямо лем Мордовиянь тонавтыцятнень ютксто максозь ансяк сонензэ.
