Филологиянь наукань кандидатсь (1978), доцентсь (1990), профессорсь Николай Степанович Алямкин шачсь 1947-це кизоня 22-це сентябрьста Мордовия Республикань Сире Шяйгавонь аймакса, мокшень Сарга велеса оцю семьяса.
Н. П. Огарёвонь лемса Мордовскяй государственнай университетонь филологиянь факультетть цебярьста шумордамдонза меле аф ламос покодсь эсь Сарга велесонза учителькс. Сяльде тонафнесь аспирантураса. Пингонь ётазь аралазе мокшень кяльть коряс диссертациянц, тяда меле арась доцентокс, а сяда тов − профессоркс. Сонь учёнаень и тонафтыень эряфоц, тевонза кемоста сотовсть университетть и мокшэрзянь кяльхнень колга наукать мархта. Покодсь мокшень кялень кафедраса и ассистентокс, и доцентокс, лама кизот ульсь мокшень кялень кафедрати вятикс.
Н. С. Алямкинонь мокшэрзянь наукати путфксоц аф ёмла. Лама пара тев тись кафедрань оцюнякс улемстонза. Сон сёрмадсь кафта сядода лама научнай и учебно-методическяй работа, конат печатлафт эрь кодама сборникса, «Мокша», «Сятко», «Народное образование» журналса. Пцтай сембе синь лемтьфт кяленьконь аф тёждя пяльксонцты − синтаксисти.Учёнайсь аноклазе и сёрмадозе «Марса, башка, китькскя вельде» пяльксть валксти, коса максфт мокшень составной лепнень сёрмадомасна.
Мордовскяй книжнай издательствась мокшэрзянь кяльхнень историяса васенцеда нолдась мокшень кяльса «Мокшень кяль. Морфология» учебник. И тя учебниксь аноклаф-тиф Н. С. Алямкинонь кядяла. Васенцеда мокшень кяльса нолдаф и учебниксь «Мокшень кяль. Синтаксис». Сон аноклаф Н. С. Алямкинонь и О. Е. Поляковонь вятемаснон ала. Сембе ширде ванондсыне учёнайсь морфологиянь и синтаксисонь ламоц кизефкснень, а 2006-це кизоня мокшень школаса 8-це класса тонафнихненди Николай Степанович аноклась и нолдазе «Мокшень кяль» учебникть, сёрмадсь тонафнема книгат, лездоманди тяштьф книгат.
Сон аф весть ульсь финно-угрань научнай конференцияса – минцень и лия масторлангоннеса. Сембе цебярь тевонзон и парста покодеманц инкса ульсь казьф РФ-нь Образованиянь министерствать, МР-нь Правительствать и МР-нь Госсобраниять Почётнай грамотаснон мархта, 1999-це кизоня арась Мордовия Республикань Госпремиянь лауреатокс, кона максфоль «Мокшень-рузонь валксть» авторонзонды, синь ёткстост фкясь ульсь Н. С. Алямкин.
Профессорть оцю путфксоц минь мокшэрзянь кяленьконь, культураньконь ванфтомаса и тейст од ваймонь максомаса.
