Надежда Фёдоровна Кабаевань 55 кизонцты - Национальная библиотека им. А. С. Пушкина Республики Мордовия

Тячи шачема шинц тяштькстасы Надежда Федоровна Кабаева – филологическяй наукань кандидатсь, мокшэрзянь кялень кафедрань доцентсь, Н. П. Огарёвонь лемса МГУ-нь филологическяй факультетонь тонафнемань работать коряс деканть заместителец. Сон шачсь 4-це майста 1971-це кизоня Адашева велеса тяниень Мордовия Республикань Кадошкинскяй районца. Шумордазе МГУ-нь филологическяй факультетть.

Н. Ф. Кабаева 1996-це кизоста сявомок 1998-це кизоти самс – эрзянь и сравнительнай языкознаниянь кафедрань ассистент, 1998-це кизоста сявомок 2001-це кизоти самс мокшень кялень кафедрань ассистент, 2001-це кизоста сявомок 2003-це кизоти самс-мокшень кялень кафедрань преподаватель, 2003-це кизоста сявомок 2015-це кизоти самс-мокшень кялень кафедрань доцент. Аф весть ётнесь кялень стажировкат Финляндиянь и Венгриянь вуснень эса. Тяниень пингть – МГУ-нь филологическяй факультетонь учебнай работать коряс деканть заместителец.

Кабаевань Н. Ф. печатлафоль 30-да лама научнай и учебно-методическяй работа. Научнай интересонза: мокшэрзянь и финно-угрань языкознаниянь фонетикань, диалектологиянь и историянь кизефксне, карань-каршек ащи лингвистись.

Башка сатфксонкса Надежда Фёдоровна казьф Мордовия Республикань Государственнай Собраниять Почётнай грамотаса, Российскяй Федерациянь наукань и высшай образованиянь Министерствать Благодарностьса, МР-нь национальнай политикать коряс Министерствать Почётнай Грамотаса. Сон – Мордовскяй государственнай университетонь трудонь ветеран.

Надежда Фёдоровна, юбилейцень мархта азыхть седиста моли лямбе валхт А. С. Пушкинонь лемса Национальнай библиотекань сотрудникне. Арьсетяма кеме шумбраши, кельгома, паваз и оцю сатфкст покодема вастсот.