«Культура» национальнай проектть «Творческие люди» федеральнай проектонц мяльса кирдезь культурань Российскяй фондть ширень кирдеманц вельде «Мордовиянь од вайгяльхть» Республиканскяй литературнай фестивальсь лиссь сяськикс. Проектти инициаторкс арасть – «“Национальный спектр”» Аф коммерческяй партнёрствась» издательхнень Ассоциациясна и А. С. Пушкинонь лемса Национальнай библиотекась.
Лятфтасаськ сянь, што фестивальсь ушедозе эсь покодеманц 18-це майста А. С. Пушкинонь лемса Национальнай библиотекаса. Литературнай лаборатория лем ала залса, коза тертьфтольхть содавикс ученайхть, штоба ётафтомс пяк эрявикс тонафтомань илат од тяштихненди. Сяда тов покодемань тефне кармасть ётама зональнай семинарса-васедемаса од ломаттнень и содаф писательхнень и поэттнень мархта Краснослободскяй, Рузаевкань и Атяшева аймакнень эзга.
18-це майста сявомок и 26-це сентябрьти самс мольсь «Мордовиянь од вайгяльхть» литературнай конкурссь.
Ня шитнень Саранск ошса ётафтовсть «Мордовиянь од вайгяльхть» Республиканскяй литературнай фестивальть шумордамань иланза. Проектти пе путсть «Мордовия литературная: связь времен и поколений» научно-практическяй литературнай конференциясь, коза кочкавсть содаф учёнайхть, литераторхт, культурань, СМИ-нь покодихть, тонафтыхть и тонафнихть, нинге лама лия инжи. Тяса ётась «Мордовиянь од вайгяльхть» сборниконь презентациясь. Сяде тов ульсь литературно-музыкальнай фестивальсь, коса мазы моронзон мархта кеняртьфтезень инжихнень «Мерема» этнографическяй фольклорнай студиясь. Республиканскяй конкурсть сяськиензонды оцю путфксснон инкса максфт питни казнят. И аделавсь тя илась сединь токай спектакльса «Не забывай незабываемое» (режиссёрсь-постановщиксь И. Кузьмин), конань няфтезь МР-нь национальнай театрань налхксихне.
