Октябрянь 11-це чистэ Саранскойсэ ютасть «Мордовиянь од вайгельть» Республиканской литературной фестиваленть меельце мероприятиятне. Ледстясынек, теварсевксэсь ушодовсь маень 18-це чистэ А. С. Пушкин лемсэ библиотекасо. Сонзэ анокстызь ды топавтызь – «Некоммерческое партнёрство “Национальный спектр”» издателень ассоциациясь ды А. С. Пушкин лемсэ раськень библиотекась (Мордовия Республика) «Культура» национальной проектэнь «Творческие люди» федеральной проектэнть лувсо. Теварсевксэнть топавтомась мольсь зярыя ковт, конань перть ютавтовсть эрьва кодат вастовомат, пелькстамот. Важодсь Литературань лаборатория, косо эсест содамочист кастызь-кепедизь од сёрмадыцятне. Лездасть тенст шкинемань тевсэ минек республикань содавикс учёнойтне, сёрмадейтне. Седе тов ютавтовсть од сёрмадыцятнень туртов зональной вастовомат-семинарт: Краснослободскойсэ, Рузаевкасо ды Атяшевасо.
Маень 18-це чистэ саезь сентябрянь 26-це чис мольсь «Мордовиянь од вайгельть» Республикань литературань пелькстамось.
Теварсевксэнть меельце мероприятиякс кармась «Мордовия литературная: связь времен и поколений» научно-практической литературной конференциясь ды «Мордовиянь од вайгельть» литературно-музыкальной фестивалесь. Конференциясо ульнесь «Мордовиянь од вайгельть» пусмонь презентациясь, конась нолдазель литературань конкурсонь пелькстамонть коряс. Литературно-музыкальной фестивальсэнть казезельть «Мордовиянь од вайгельть» Республикань конкурсонь изницятне. Тесэ эсь ёрокчист невтизь «Мерема» этнографической фольклорной студиясь. Прядызь покшчинть раськень театрань налксицятне «Не забывай незабываемое» (режиссёрось-постановщикесь И. Кузьмин) спектаклясонть.
