Мокшэрзянь од литературась 1920-це кизотнень вииякшнесь газетатнень вельде. Синь эсост сёрмадыхне печатлакшнесть стихт, аф оцю азкст, фельетотт, сёрматфсна курокста пачкотькшнесть лувихненди-велеряйхненди. Газетатне лездсть мокшэрзянь литературати келептемс пацянзон и тумс инголи. Писателень валсь коль сяда крхкаста сувсесь народть эряфс, сяс сонць пингсь вешсь панжемс художественнай журналхт. И синь эвондасть. «Валда ян» – тяфта лемневсть тяниень «Мокша» журналть васенце номеронза, синь лиссть 1928-це кизоня Пензаса. Журналть виияманцты-касоманцты лама вий путсть васенце редакторонза – И. В. Шотин, Л. Е. Бажанов, С. Б. Леонтьев, Н. С. Шестов. Мокшэрзянь государственностть тиемда меле национальнай журналхнень ётафтозь Саранскяи. 1932-це кизоста сявомок журналсь лисендсь «Колхозонь эряф» лем ала. Ся кизотнень журналса содафокс арасть М. Безбородов, 3. Дорофеев, Л. Макулов, М. Бебан, Я. Пинясов, П. Левчаев, В. Виард, Ф. Атянин и лиятне. Синь поэмасна, повестьсна, азкссна меле сувасть хрестоматиянь книгатненди.
Кяльсь, кода содаф, литературать сузмоц. А 1930-це кизотнень ушетксста аф кржаль кялень педа-пес апак арьсек кизефкста. Фкя лацонь литературнай кяльсь аньцек-аньцек тиендевсь, кялень конференциятнень эса ламоль аф фкя мяльда. Ашельхть орфографиянь кеме нормат, литераторхне сёрмадсть кажнайсь эсь диалектсонза, сяс аф сембось шарьхкотькшневсь. «Мокша» журналсь оржапнезе-петнезе валть смузенц, панчсесь ки шарьхкодевиста сёрмадомати.
Великай Отечественнай войнань кизотнень ламоц мокшень и эрзянь писательхне фронтсольхть. Финцне оружиянь кирдезь, омбонцне дивизионнай газетатнень эса покодезь аралакшнезь Родинать. Национальнай журналхне ся пингть ашесть лисенде. Сяс «Мокша» журналти панксонь пандыкс ульсь «Сяськома» лем ала альманахсь, кона лисендсь весть-кафксть кизоти. «Мокшесь» одукс кармасть нолявома 1956-це кизоня. Аф кржа вий тянди путсть ингольдень фронтовикне. Васендакиге лятфтама Мордовиянь народнай поэтсь И. М. Девин. Кода тевонь содай писатель, ульсь и асу редакторкс, лац вятезе журналонь аноклама и ноляма тевть. Редакциянь арзяняса фалу ламоль цебярь литературнай произведения. Творческяй оцю виень марязь сёрмадсть А. Малькин, И. Кишняков, С. Ларионов, С. Самошкин, Г. Меркушкин, П. Торопкин, М. Сайгин, А. Тяпаев и лия поэттне, прозаикне и драматуркне. Сембось, мезсь васенда печатлакшневсь «Мокша» журналса, меле козякофнезе литературать. Журналса лисьф произведениянц сёрмадысь аф пелезь каннезе издательствав. Т. Кирдяшкинонь «Кели «Мокша», М. Бебанонь «Тундань нармотть», И. Кишняковонь «Иссась шуди Волгав», С. Ларионовонь «Хрусталень пайкт», П. Левчаевонь «Стирнят-якстернят», И. Девинонь «Нардише», М. Сайгинонь «Давол» романцна, В. Радинонь «Сембе минь ломаттяма» повестец, Ю. Кузнецовонь, В. Мишанинать, В. Левинонь повестьсна и азкссна, А. Малькинонь, А. Тяпаевонь, С. Кинякинонь, И. Кудашкинонь, В. Кригинонь стихсна и поэмасна пачкодсть лувити «Мокшеть» вельде. Журналса азондсть критиконь виде вал Н. Черапкин, Б. Кирюшкин, А. Алёшкин, А. Макушкин и лиятне.
Лувихненди кельговикс арась «Палакссь», пеетькшнемань-сингорямань уженясь. Эсонза фалу муят и рахафты азкс, и оржа фельетон, и пеетьфти стихт.
Журналса фалу мяляфтозь иттнень. Мезе эряви теест лувомс, печатлакшневсь «Якстерь тяштеня» лопанятнень эса. Кой-мзяра пингта меле тя арась оцю журналть потмоса ёмла журналнякс. Редакцияса покодихне шарьхкодезь, тя – идень афкуксонь журналть ушетксоц. Тяфта и лиссь. Тяни «Якстерь тяштенясь» – идень кельговикс журнал, сонь содасазь и лувондсазь сембе мокшень школатнень эса, лувондсазь кудса. «Мокша» журналть «Идец» музе эсь кинц.
«Мокша» журналса главнай редакторкс ульсть М. Бебан, И. Девин, М. Сайгин, А. Тяпаев, В. Сурков, Г. Пинясов, М. Малькина, В. Лобанов. Эрь редакторсь эсь лацонза вятезень творчествань тефнень, а сембода эрявиксокс лядондсь сякось – оцю вешфкссь произведениять художественнай ширенцты, мокшень кяльть арушинцты. Сембода пяк тянди оцю мяль шарфнесь «Мокша» журналса главнай редакторкс улемстонза Г. Пинясов. Сёрмадыдовок аф кржаль. Нят – Ю. Кузнецов, С. Кинякин, И. Кудашкин, П. Вельматов, В. Мишанина, Ф. Пьянзин, В. Кригин, А. Алёшкин, М. Малькина и лиятне. Ня прозаикне, поэттне, литературоветтне азозь мокшэрзянь литератураса эсь валснон. «Мокшесь» панчсь ки тяниень содаф поэттненди, кода П. Алёшинась, Р. Орловась, Н. Циликин.
Журналсь фалу кемокснесыне сотксонзон. Ётафневихть и печатлакшневихть финно-угорскяй литературань инь цебярь произведениятне. Тяфта, «Мокша» журналса печатлафоль «Калевала» карело-финскяй эпость ламошкац, мокшекс сонь ётафтозе С. Кинякин. Ётафнефт стихт, азкст, повестть марийскяй, удмуртскяй, коминь кяльста. Мокшень писательхнень произведениясновок ётафневсть и лисендсть финно-угрань раднянь кяльса.
Эряви азомс, Мордовия Республикань Правительствась национальнай журналхнень лувондсыне мокшетненди эрявикс литературакс, журналхне кунара ни арасть мокшень и эрзянь школатнень эса цебярь лездыкс.
«Мокша» журналть нинге ули тячиец, сяс мес улихть авторонза, лувиенза, улихть лездыенза. Ичкоздень мокшетненди «Мокшесь» – тядянь-алянь модать мархта соткс, мокшень эрек мялень пачфни, лямбе валонь азы пара ялга. Катк лама киза нинге ули кели и валда кибряц.
