23 ноябрьста топоди 105 киза шачема шистонза мокшень драматургти, педагогти, ученайти, МАССР-нь народнай просвещениянь заслуженнай работникти, общественнай деятельти Григорий Яковлевич Меркушкинонди. Сон шачсь 1917-це кизоня Инсарскяй райононь Иссапря велеса крестьянонь семьяса. 1934-це кизоня средняй школать аделамда меле кармась тонафнема Саранскяйса А. И. Полежаевонь лемса Мокшэрзянь пединститутть историко-филологическяй факультетсонза. 1938-це кизоста сявомок войнать ушедомс покодсь историянь учителькс Темниковскяй педучилищаса, Ковылкинскяй райононь Рыбкинскяй школаса. Григорий Яковлевич Великай Отечественнай войнань участник, казьф орденца и медальса. 1944-це кизоня путозь МАССР-нь Министрань Советть видеса кялень, литературань, историянь и экономикань институтонь директоркс. Тяда меле покодсь КПСС-нь Мордовскяй обкомонь секретарькс. 1960-69-це кизотнень Мордовскяй госуниверситетонь ректор.

Литературав Г. Я. Меркушкин сась война мельдень кизотнень. Мокшэрзянь литературать козякофтозь сонь драматургическяй произведениянза – «Народть лемса», «Шинь стяма», «Эряфонь киге», «Сенем валда», «Толонь кит» и лиятне. Сон сёрмадсь сембоц 8 пьесат, эздост нилетне путфтольхть Саранскяень театраса.

Григорий Яковлевич нинге содаф кода оцю ученай. Сон сёрмадсь лама работа мокшэрзянь народть историянц, культуранц колга, крхкаста тонафнезень синь ётксост соткснень. «Масторава» эпость авторонзон-кочкаензон эзда фкясь. Сембода оцюкс эздост лувондови «Развитие науки в Мордовии» исследованияц. Эсонза ванондсыне Мордовияса наукатнень касомань-кеподемань киснон. Марса лия авторхнень мархта сон аноклась «История Мордовской АССР» 7–8 классненди Мордовиянь историять коряс учебнай пособиять, «Рузонь-мокшень валксть» авторонзон-кочкаензон эзда фкясь. Минь литературасонк кржа сёрмадыда драматургиянь жанраса. Григорий Меркушкин эряфонц аделамс ускозе тя аф тёждя усфть. Сонь произведениянза тонафневихть школаса, пьесанза путневихть театрань сценава, синь кошярясамазь ару сельмоса ваномс мирть лангс.

Аделавсь Григорий Яковлевичень эряфоц самай творческяй вийнзон панжема пингста. Драматургть сёрмадома планонза оцюфтольхть. Сон мекольдень кизотнень покодсь кафта документальнай пьеса лангса: генералть Пуркаевонь и поэтть Дорофеевонь колга. Кенерсь аделамс Захар Дорофеевонь колга пьесать аньцек васенце пяльксонц.

Григорий Яковлевич Меркушкинонь сембе книганза, пьесанза и научнай трудонза пара мяльса ванфтовихть А. С. Пушкинонь лемса Национальнай библиотекань национальнай и краеведческяй отделонь фондса.