Анатолий Эскин чачсь 1937-це иень медьковонь 10-це чистэ Мордовиянь Кочкуровань райононь Семилей велесэ, сокицянь-видицянь семиясо. Средней школань прядомадо мейле тонавтнесь Мордовской госуниверситетэнь историянь-филологиянь факультетсэ (1960), НИИЯЛИЭ-нь аспирантурасо (1963). Университетсэ ульнесь теезь литературань кужо, конань ветясь эрзянь содавикс поэтэсь Артур Моро. Эрямось чавсь те кужосонть лисьмапрякс. Сон панжизе литературас кинть минек ламо содавикс сёрмадейтненень, сынст ютксо А. Эскингак.
Важодсь «Сурань толт» (ней – «Сятко») журналсо литсотрудникекс, телерадиокомитетсэ литературно-художественной передачатнень редакторокс, МАССР-нь писателень Союзсо литконсультантокс, «Эрзянь правда» газетасо литсотрудникекс. 1976–1977-це иетнестэ ульнесь «Сятко» журналонь ответственной секретарекс.
Ютыть иеть, Эскинэнь перанзо алдо лисить валморонь ды поэмань вете книгат: «Оят-ялгат» (1963), «Сюк пря» (1966), «Чадыть цецят» (1969), «Паро ёжо» (1973), «Тундонь пиземс» (1977). Сынст ванкшномась, алкукскак, кармавты кортамо эйстэнзэ кода пек виев поэттэ-лирикте.
Кулось А. У. Эскин 1977-це иень февралень 25-це чистэ. «Умарькс тарад» книгазо (1992) нолдазель куломадонзо мейле.
