Николай Петрович Макаркин – экономическяй наукань доктор, профессор, РФ-нь наукань заслуженнай деятель, МР-нь Государственнай премиянь лауреат, 2010-це кизоста сявомок и тяниень пинкти молемс Н. П. Огарёвонь лемса мокшэрзянь университетть президентоц.
Сон шачсь 10-це декабрьста 1943-це кизоня Ковылкина аймаконь Од Пшень велеса, крестьянонь семьяса. Шумордазень Мокшэрзянь государственнай университетть, СССР-нь Наукань академиять Экономикань институтонц аспирантуранц. 1972-це кизоста сявомок – преподаватель, сяльде старшай преподаватель, 1981-це кизоня – кафедрань заведующай, 1983-це кизоня – экономическяй факультетть деканоц, 1991-це кизоня – Мордовскяй государственнай университетть ректороц.
Макаркинонь научнай тевонза сотфт техническяй систематнень качестваснон и кемошиснон касфтомаснон, экономикаса математическяй метоттнень тевс нолямаснон мархта. Путсь ушеткс од научнай направления – техникань кемошить экономическяй теориянцты. Ученайть методонза нолявихть тевс Россиянь промышленнай предприятиятнень и научно-исследовательскяй учреждениятнень эса.
Н. П. Макаркин – аф фкя республикаса комплекснай научно-техничекяй программань руководитель, Наукань и образованиянь мордовскяй республиканскяй межотраслевой центрать директороц, Мордовскяй государственнай институтть видеса экономикань НИИ-ть директороц. Сёрмадсь 15 монография, 39 учебник и тонафнемань пособия. Аноклась наукань 5 докторхт и 43 наукань кандидат, 350 лама научнай и учебно-методическяй работа. Макаркин Н. П. «Вестник Мордовского университета» и «Интеграция образования» журналонь главнай редактор. 1991-це кизоста сявомок – Саранск ошень ректоронь советть председателец. Регион, тонафнемань округть учёнай советонц, Россиянь ВЭО-ть мордовскяй отделениянц, «Мордовиянь интеллигенциять конгрессоц» республиканскяй общественнай движениять, наукати и образованияти лездомань республикань фондть председателец. Сятнень ётксоль, кит аноклазь и тисть научнай экспертиза рыночнай экономикань законодательнай акттненди, Россиянь Конституцияти. Сяськсь «Менеджер-2000» всероссийскяй конкурсса «Образованиянь сферась» номинацияса. РСФСР-нь Верховнай Советонь (1990), МР-нь Госсобраниянь (1994) депутат. Казьф Почётонь орденца и лама лия казняса.
