Любаев Павел Кириллович (1919–2013)

Ацамковонь 24-це чистэ топодевельть бу 105 иеть Павел Кириллович Любаевнень. Чачсь сон Нижней ёнксонь Покш Болдинань буень Пикшня эрзянь велесэ.

1935-це иестэ прядсь од ломанень школа, мейле тонавтнесь Мордовиянь рабфаксо.

Ютызе Ине Отечественной войнанть. Казезь «За боевые заслуги», «За оборону Сталинграда» медальтнесэ, Отечественной войнань II степенень орденсэ.

1946-це иестэ саезь Павел Кириллович важодсь милициясо. Ульнесь оперуполномоченноекс Ковылкинасо, МВД-нь аппаратсо отделэнь прявтонь полавтыцякс. 1969-це иестэ подполковникень званиясо тусь отставкас. 2003-це иестэ тензэ максозель полковникень звания.

Литературас кизэ ушодовсь 1938-це иестэ, зярдо «Ленинэнь киява» газетасо лиссь «Тундо» васенце валморозо. Мейле сёрмадовксонзо лиснесть «Сятко», «Мокша», «Волга», «Нева», «Звезда», «Аврора», «Советский воин» журналтнэсэ, «Эрзянь правда», «Литературная Россия», «Русь» газетатнесэ.

Ловныцятне лембестэ вастызь «Мирэнь кис» (1950), «Ялгань вал» (1956), «Голос сердца» (1961), «Пичень гайть» (1967), «Толбандянь сяткт» (1970), «Валдо ведьбайгеть» (1971), «Зёрна радости» (1984), «Кемема» (1990), «Сюкпря» (2000), «Поясок» (2003) поэзиянь пусмонзо, Мордовиянь васенце Советской Coюзонь Геройденть И. А. Пожарскийде «Васенце теште» (1994) документальной повестензэ, «Мужество» (2005) сборникензэ, «Кочказь произведения» (2009) книганзо.

1949-це иестэ П. К. Любаев совавтозель Россиянь сёрмадыцянь вейсэндявксос. 1981-це иестэ тензэ максозель МАССР-нь заслуженной сёрмадыцянь лемесь.

Кулось 2013-це иень умарьковонь 29-це чистэ, калмазь Саранскойсэ.