Лукьянов Алексей Миронович (1910–1991) - Национальная библиотека им. А. С. Пушкина Республики Мордовия

Эйзюрковонь 15-це чистэ топодевельть бу 115 иеть эрзянь поэтэнтень, прозаикентень, журналистэнтень Алексей Миронович Лукьяновнень. Сон чачсь Самара ёнксонь Похвистневань райононь Красные Ключи велесэ. Ушодкс школанть прядомадо мейле тонавтнесь Вишка Толканонь сисем иень школасо. Тонавтнемстэ ушодсь валморонь сёрмадомо. 1926-це иестэ «Яксгере теште» газетасо лиссь «Нурька морыне» васенце стихотворениязо. Школанть прядомадо мейле Алексей Лукьяновонь, кода касыця поэтэнть, саизь важодеме «Якстере теште» газетань литсотрудникекс. Чокшне ланга сон тонавтнесь Московонь государственной университетэнь литературной факультетсэ.

1932–1935-це иетнестэ A. M. Лукьянов эрясь Саранскойсэ. Важодсь «Эрзянь коммуна» газетасо, «Сятко» журналсо, Мордовиянь сёрмадеень союзонь правлениясо. Те шкастонть сёрмадсь ламо валморот, поэмат, ёвтнемат, повестть ды стихсэ роман, сеедьстэ вастневсь ловныцятнень марто. 1935-це иестэ A. Лукьянов велявтсь Московов, ульнесь Учпедгизэнь редакторокс. Зярдо ушодовсь Ине Отечественной войнась, тусь фронтов, начколесь натой Порт-Артуров. Казезь Якстере Знамянь кавто орденсэ ды ламо медальсэ.

Сёрмадеесь нолдась зярыя книгат, ламотне эйстэст лиссть ютазь пингень 30-це иетнестэ. Неть: «Зорясь лазовсь» (1930), «Минь изнятано» (1932), «Икелев», «Кочказь сёрмадовкст», «Кинель» (1933), «Ася» (1934). «Валдо ки» покш романозо лиссь 1958-це иестэ. Сонзэ сёрмадовкстнэ сеедьстэ нечатавсть «Сятко» журналонь ды «Эрзянь правда» газетань страницатнесэ.

Кулось A. M. Лукьянов 1991-це иень февралень 24-це чистэ. Калмазь Московсо.