Языковедсь, мокшень кялень педагогсь, филологическяй наукань кандидатсь Степан Ильич Липатов шачсь 1938-це кизоня ацамковонь 10-це шиста Ковылкина аймаконь Сире Сомай велеса. Тядянза-алянза сокай-види ломаттельхть, грамотас ашесть сода, но тиендезь семботь сянкса, штоба шабасна улельхть тонафнефт.
Эсь велесост сисем классонь шумордамда меле Степан Липатов поладозе тонафнеманц Рыбкина велень средняй школаса. Маряк, самай ся пингоня появась сонценьге мялец арамс учителькс. Сяс сон школать аделамда меле кармась тонафнема Мордовскяй пединститутонь историко-филологическяй факультетса (1957-це кизоня пединститутсь тифоль Мордовскяй государственнай университетокс). Тонафнемать аделамда меле синцень аймаконь Зайця велень школаса кафта кизот вятсь родной и рузонь кялень и литературань урокт.
1964-це кизоня Степан Ильич кармась тонафнема Мордовскяй государственнай университетть видеса аспирантураса. «Рыбкинань-Мамолаевань эряйхнень корхтамаса башка ширетне» темать коряс кандидатонь диссертациянц аралазе 1972-це кизоня Эстонияса, Тарту ошень университетса. Башка мяль шарфтсь С. И. Липатовонь кандидатонь диссерта-циянц лангс и шназе сонь Пауль Аристэ академиксь. Сон ульсь теенза оппонентокс. А вов мезе сермады Степан Ильичень тевонц колга содаф финно-угроведсь А. П. Феоктистов профессорсь: «Диссертациянь сермадомс С. И. Липатов изь пеле сявомс актуальнай и стака кизефкс. Корязонза сон кочкась сатомшка диалектонь материал, конанди макссь крхка анализ. Рыбкинань-Мамолаевань мокшекс корхтамать колга исследованиять педа-пес сёрмадомац нардась нинге фкя «акша васта» мокшэрзянь диалектологиянь картать лангса».
Аспирантурать аделамда меле сон кармась покодема университетонь мокшэрзянь кялень кафедраса. Мзярда филологиянь факультетса панчфоль мокшень кялень кафедра, кочкафоль тоза профессоркс. Аф фкя киза вятезе сонць тя кафедрать.
Степан Ильич Липатов вятсь оцю научно-исследовательскяй работа. Сон ванондозень мокшень литературнай кяльса и диалекттнень эса фонетикань, морфологиянь и лексикань ламоц кизефкснень, сёрмадсь 100-да лама научнай и методическяй статья мокшень кяльть коряс, методическяй пособият тонафнихненди, тиендсь доклатт научнай пуромксненди. Степан Ильич ульсь «Грамматика мордовских языков», «Лексикология современных мордовских языков», «Методика преподавания мордовских (мокшанского и эрзянского) языков» вузонь учебникнень аноклайснон ёткста фкясь. Лама вий путсь мокшень кяльса сёрмадомань, корхтамань норматнень и «Мокшень-рузонь» валксть анокламаснонды. Научнай работанза нолявсть аф аньцек республикасонк, но и лия масторлангонь эряйхнень журналга, конат лисендсть Эстонияса, Финляндияса. Аф кржа тись мокшень школатнень эса шачема кяльть ванфтоманц и виияфтоманц ширьде. Сёрматкшнесь рецензият школьнай учебникненди и учебнай пособиятненди, методикать коряс учительхненди лезксонди статьят, макссесь питнидонга питни материал кяльть историянц тонафнемста, а стане жа литературнай кяльть козякофтомаса-касфтомаса, конат печатлакшневсть «Мокша» журналса и «Мокшень правда» газетаса.
Оцю путфксонкса кельговикс тевонцты учёнайсь аф весть казендевсь Почетнай грамотаса. Сонь сембе эряфоц – научнайсь, педагогическяйсь и общественнайсь – тя творческяй вешендема, конань эзда лац няеви и эряфти кельгомась.
