А. С. Пушкинэнь лемсэ Национальной библиотекасо ютась покш чи, сонь ульнесь алтазь эрзянь сказительницантень, поэтессантень, композиторонтень, МАССР-нь культурань заслуженной важодицянтень, МССР-нь Государственной премиянь ды Мордовиянь комсомолонь премиянь лауреатонтень Серафима Марковна Люлякинань 100 иень топодемантень.
1982-це иестэ Мордовиянь книгань издательствасо лиссь С. М. Люлякинань моронь ды ёвтамонь сборникезэ, конань лемезэ «Моронь гайть». Иень ютазь книгань Международной выставкасо те пусмось казезель васенце степенень дипломсо. Теде мейле сказительницась нолдась оште зярыя сборникть: «Расскажу тебе»» (1986), «Минек оянок» (1988), «Тонеть, Мордовиям, моран» (1990), «Кодамо вараканть видечизэ» (1991), «Евтнян тыненк, кода нудеесь морась» (1992), «Сказки, стихи, басни» (1993). Неть сборниктнес совасть ёвтамот, лайшемат, ёвкст, морот, стихотвореният, частушкат, морот, содамоёвкст, лавсь вельксэнь морот ды лия произведеният.
Лецтнемань чокшнентень сакшность содавикс писательть, валморонь сёрмадыцят, библиотекарть, тонавтыцят, С. М. Люлякинань шкинемань вечкицянзо.
Панжызе мероприятиянть Ю. А. Мишанин, Мордовиянь эрзянь ды мокшонь раськетнень регионъютконь общественной вейсэндявксонь прявтось.
Люлякинань шкинемадо домка кортамо тейсь национальной ды краеведческой отделэнь прявт библиотекаресь В. Б. Бояркина. Эрзянь ды рузонь кельсэ валморонзо ловнызь Р. С. Зорькина ды С. В. Малькова. Седейстэ молиця валсо лецтнизь Люлякинань ялганзо-оянзо, те – Маризь Кемаль, Р. Д. Жегалина, Р. Б. Щанкина, Т. С. Баргова, Г. С. Гребенцов ды лият.
«Морамо» фольклорной ансамблянь участниктне морасть кезерень эрзянь морот. «Ламзурь» фольклорно-этнографической ансамблясь морызь весень туртов Марковнань «Эрзянь кель», «Ванюша-комбайнер» моронзо.
Лецтнемань чокшнесэнть гайгссь эсензэ Серафима Марковнань вайгелезэ, конань сёрмадызь икеле шкасто.
Мероприятиясь пек тусь весень мельс.
