Лавровская Александра Петровна (1870–1962)

Эйзюрковонь 20-це чистэ топодевельть бу 155 иеть педагогонтень, МАССР-нь заслуженной тонатыцянтень Александра Петровна Лавровскаянень. Чачсь сон 1870-це иестэ Симбирень губерниянь Орданбуень Симкина велесэ. Тонавтнесь Симбирень епархиянь училищасо. Теде мейле кучозель важодеме Сурвелев (Сабаево). Сон покш мельсэ, весе оймензэ путозь, ушодызе лезэв тевензэ. Содазь, васня уроктнэнь ветясь рузонь кельсэ, конань тонавтницятне чарькодсть пек беряньстэ. Аламонь-аламонь весементь кармась ёвтнеме эрзякс, куш тонавтнема книгатне ульнесть рузонь. Шкань ютазь эйкакштнэ кармасть парсте чарькодеме ды Лавровскаянь уроктнэсэ кавонест кельтне эскелязевсть вейсэ.

Важодемань васенце иестэнть тонавтыцясь пурнынзе перьканзо велень од ломантнень, кармась содавтомост Пушкинэнь, Лермонтовонь, Некрасовонь шкинемаст марто. Кона валтнэ эзть чарькодеве, ютавтсь эрзянь кельс.

Александра Петровна бажась тонавтомс аволь ансяк сёрмас содамо, сон кармавтсь ояксчисэ эрямо, сыре ломаннень мелень ваномо, тевень тееме, видечинь кандомо. Сурвелесэ курок весе кармасть пек вечкемензэ.

1917-це иес Лавровская ськамонзо кандсь содамочи Сурвелень колмо классонь школасонть. Мейле кармасть велявтомо сонзэ икелень тонавтницятне, конат покшолгадсть. Сынст марто вейсэ келейгавтызь школанть, панжсть ловнома кудо. Сурвелев састь кавто од тонавтыцят. А. П. Лавровская пек кецнесь тенень. Сон бажась весемесэ лездамс одтнэнень. 1940-це иень даволговонь 25-це чистэ паро важодеманть кисэ сонензэ максозель МАССР-нь школань заслуженной тонавтыцянь лемесь.

Ине войнань иетнестэяк Александра Петровна топавтсь вечкевикс тевензэ. А стяко 1943 иестэ Кочкурбуень РОНО-сь яволявтсь тензэ сюкпря. Изнямонь чиденть мейле Кочкурбуень ловнома кудосо А. П. Лавровскаянень максозель «За доблестный труд в Великой Отечественной войне 1941–1945 гг.» медалесь.

1950 иенть ушодомсто Сурвелесэ ульнесь кавто этажсо школа, конаньсэ тонавтнесть 1400 эйкакшт, важодсть 64 тонавтыцят.

1960 иень чадыковсто «Молодой ленинец» газетасо максозель Александра Петровнань фотографиязо. Лия казнетнень ютксо аванть мештесэ цитнесть Ленинэнь кавто ордент. Сестэ сонензэ ульнесть 90 иеть. Сон пенсиясоль, но важодемеде эзь лотксе, зярс чавсь седеезэ.

Кулось А. П. Лавровская 1962 иень даволговонь 5-це чистэ, 92 иесэ. Куломазо марявсь покш седейризксэкс, но сон эри тонавтницянзо седейсэ, конат кандыть сонзэ оймень валдо сяткотнень.