Иван Данилович Пиняев (1923–1979)
Таштамковонь 14-це чистэ топодевельть бу 100 иеть эрзянь поэтэнтень, прозаикентень, МАССР-нь заслуженной сермадеентень Иван Данилович Пиняевнень. Чачсь сон Чувашиянь Порецкбуень Алвелесэ. Тонавтнесь школасо, конань прядомадо мейле, 1942-це иестэ, туекшнэсь Ине Отечествань войнав. Олякстомсть фашисттнэнь эйстэ Румыниянть, Венгриянть, Чехословакиянть.
Войнань прядомадо мейле ульнесь Чувашиянь пединститутонь студентэкс. Се шкастонть саезь ушоды стихень сёрмадомо, А стяко институтонь прядомадо мейле сайсызь важодеме «Советская Чувашия» газетав. Ниле иень ютазь сон сы эрямо ды важодеме Саран ошов. Ульнесь отделэнь прявтокс «Советская Мордовия» газетасо, редакторокс Мордкизсэ. 1971-це иестэ кочказель Мордовиянь Сёрмадеень вейсэндявксонь правлениянь ответственной секретарекс.
Иван Пиняев парсте важодсь кода поэзисо, истя прозасояк. Сонзэ лиссть 30-де ламо книганзо, эйстэст сехте содавикстнэ: «Родные просторы», «Мирный разговор», «В родном краю», «Моя подпись», «Сирень», «Я иду по земле…», «Мужество» поэманть алтызе M. П. Девятаев лётчикентень.
Кодгеменце иетнестэ поэтэсь сёрмадсь кавто томсо «Шла дивизия вперед» художественно-документальной роман, кона тонавтневи школасо. Теде башка сёрмадсь ёвтнемат, очеркть республикань содавикс ломантнеде.
Кода содазь, И. Пиняев ульнесь эрзя, но сёрмадсь рузокс. Кавто келень парсте содамось лездась тензэ ютавтомс рузонь кельс эрзянь ды мокшонь поэттнэнь стихест.
Иван Данилович покш лезкс макссь одтнэнень, свал yльнесь ютавтневиця сёрмадеень семинаронь прявтокс.
Иван Пиняевень лемезэ содавиксэкс теевсь масторонь келес, книганзо ламо тиражсо лиснесть Московсо, стихензэ ютавтозь зярыя кельс. Поэзиязо домка, мазый ды виев.
