Краеведениянь кулят «Шкась. Тевтне. Ломантне»: Ромашкин Владимир Иванович (1951–2002)

Эрзянь содавикс музыкантонтень-фольклористэнтень Владимир Иванович Ромашкиннэнь (Йовлань Олонень) таштамковонь 6-це чистэ топодевельть бу 75 иеть. Сон чачсь Ицялвелесэ. Прядсь Саранскоень Л. П. Кирюковонь лемсэ музыкань училищань дирижёронь-хоронь отделения (1975), Казанонь консерваториянь дирижёронь-хоронь факультет (1980), МНИИЯЛИЭ-нь аспирантура (1986).

1980–1989-це иетнестэ ульнесь МНИИЯЛИЭ-нь фольклоронь ды искусствань секторонь васня младшей, мейле старшей научной сотрудникекс. 1990–1992-це иетнестэ – культурань Республикань училищасо музыкань дисциплинань тонавтыця.

1990-це иестэ Владимир Ромашкин пурнызе «Торама» фольклоронь ансамблянть, конань аламо шкань ютазь кармасть содамо аволь ансяк Мордовиясо, Россиянь келес ды омбомасторсояк. Пурнась эрзянь-мокшонь раськень морот ды седямонь невтевкст. Седясь кальцяемат, нюди, кайга, чавома, вешкема, торамо кезэрень седямопельтнесэ.

Владимир Иванович сёрмадынзе «Ушодкст» (1985) ды «Каратайть» (1987) этномузыкальной фильматненень сценарийтнень, снимавсь «Тораманть тердемазо» телефильмасонть (1994).

Владимир Иванович Ромашкин – МР-нь искусствань заслуженной деятель (2001), МР-нь Государственной премиянь (1994) ды А. П. Рябовонь лемсэ эрзянь келень идемань фондонь премиянь (2002) лауреат.

Кулось 2002-це иень  умарьковонь 29-це чистэ. Калмазь Саранскойсэ.