Краеведениянь кулят «Шкась. Тевтне. Ломантне»: Марина Тарасова

Эрзянь ёвксонь-прозань сёрмадыцясь Марина Тарасова чачсь вейке тёжа вейксэсядт кодгемень кавксоце (1968) иень медьковонь кеменце чистэ Мордовия Республикань Кочкурбуень Од Мурза велесэ. 1985-це иестэ сон прядызе Од Мурза велень средней школанть ды сась тонавтнеме Саран ошов, Н. П. Огарёв лемсэ Мордовской университетэнь филологиянь факультетэв. Университетэнь прядомадо мейле важодсь «Чилисема» журналонь редакциясо, Мордовиянь правительствасо келень, литературань, экономикань ды историянь научно-исследовательской институтсо, седе кувать – «Сятко» журналсо (1997–2012-це иетнестэ).

Тарасова Марина васень стихензэ, ёвтнеманзо, ёвксонзо сёрмадынзе эйкакшпорасто. Сынь ульнесть рузонь кельсэ. Шкинемань кинзэ лангс жо кеместэ стясь эрзянь кельсэ сёрмадозь ёвксонзо вельде. Сынст эйстэ седе ламотнень печатынзе «Чилисема» журналсо. Васенце эрзянь кельсэ сёрмадозь ёвксось ульнесь «Вармазей». Од сёрмадыцянтень пек лездась «Валдыне» литературной курось, конань ветясь эрзянь содавикс поэтэсь Михаил Втулкин. Тесэ теевсь малавиксэкс эрзянь кельсэ лия од сёрмадыцятнень марто. Тонавтнесь пельдест, косо-косо пелькстаськак.

Ёвксонзо Тарасовань печатавсть «Родник» (1991-це ие), «Ёвксонь кужо» (1993-це ие), вейсэнь пусмотнесэ. «Псакань ёвкст» башка книгазо лиссь Эрзя-мокшонь книгань издательствасо 1996-це иестэ, ды совась эрзянь келень корпусонть анокстамсто (Erzya Source Literature (Corpora)). Пек лембестэ ловныцятне вастызь Тарасова Маринань «Мурзай», «Мон карман учомо», «Вандора ды Ласькамо» ды лия ламо литературной ёвксонзо, конат лиснесть «Чилисема», «Сятко», «Странник» журналтнэсэ. Ёвксонь героензэ седе сеедьстэ нармунть, кудоютконь ды идем ракшат, тикшеть, касовкст. Сынь пек молить ломань ёнов. Эрямост, тевест-ладост кармавтыть талномо эрьва ловныцянть.