Краеведениянь кулят «Шкась. Тевтне. Ломантне» Куляскин Дмитрий Степанович (1921–1967)

Таштамковонь 21-це чистэ топодевельть бу 105 иеть эрзянь содавикс поэтэнтень, прозаикентень Дмитрий Степанович Куляскиннэнь. Чачсь сон Пензань ёнксонь Лопатинской буень Николаевка велесэ. Тонавтнесь Саратовской областень Петровской педтехникумсо, тосто ютавтозель Саранскоень педагогической училищав. Мейле прядызе Мордовской пединститутонь филологиянь факультетэнть. Теке шкастонть ульнесь Мордкизэнь литературной редакторокс.

Куляскин Д. С. Ине Отечественной войнань участник. 1946-це иестэ Саранскоев мекев самодонзо мейле кармась важодеме Мордовской книжной издательствасо эрзянь литературань редакторокс. 1955-це иестэ лавшо шумбрачинзэ кувалма тусь пенсияв.

Дмитрий Степанович Куляскин – СССР-нь Сёрмадеень вейсэндявксос совиця (1948). Сёрмадомо ушодсь 1935-це иестэ. Ламо произведениянзо совасть 1–5-це класстнэнь туртов учебниктнес. Лиссть «Монь тундом» (1951), «Мирэнь вайгель» (1959) стихень ды «Ёвтнемат» (1953) прозань сборникензэ, «Горкасо» поэмазо (1963), «Пичай» ёвксозо (1966). В. Юшкинэнь ютавтомасо «Пичай» ёвксось кавксть нолдазель рузонь кельсэ (1966, 1975).        

Кулось Дмитрий Степанович 1967-це аштемковонь 25-це чистэ. Калмазь Саранскойсэ.