Краеведениянь кулят «Шкась. Тевтне. Ломантне»: Колядёнков Михаил Никитич (1896–967)

Панжиковонь 21-це чистэ топодевельть бу 130 иеть эрзянь содавикс учёноентень-лингвистэнтень, филологиянь докторонтень, профессоронтень, Мордовиянь наукань заслуженной деятелентень Михаил Никитич Колядёнковнень. Сон чачсь Ицял велесэ. Тонавтнесь Порецкоень учителень семинариясо. Прядомадонзо мейле саизь империалистической войнав. Вейке тюремасо стакасто ранявсь, седе тов нолдызь кудов. Васня кармась важодеме эсест велень начальной школасо, мейле аравтызь ошонь народной образованиянь инспекторокс.

Эрямось од педагогонть пачтнизе Отяжелень Челпанова велень школавгак, косо сон ветясь тиринь келень ды литературань урокт. Теде мейле кучизь тонавтомо Алтышевань школав. Курок М. Н. Колядёнковонь аравтызь Орданьбуень педучилищань завучокс. Кода методист, М. Н. Колядёнков невтизе эсь прянзо колоньгеменце иетнестэ, зярдо важодсь школань инспекторокс Мордовиянь Наркомпроссо. Те шкастонть кармась методикань коряс статьянь сёрмадомо, конатне лиснесть «Методический руководитель» ды «В помощь школе» журналтнэсэ. Седе тов лиссь «Русский язык в мордовской школе» книгазо.

Мокшэрзянь культурань научно-исследовательской институтонть марто М. Н. Колядёнков сюлмизе эрямонзо 1935-це иестэ. Васня ульнесь аспирантокс. Научной сотрудникекс улемстэ Михаил Никитич кармась эрзянь келень орфографиянь валксонь сёрмадомо, кона мейле лиссь 1939-це иестэ Московсо. Кандидатонь диссертациянзо («Эрзянь ды мокшонь кельтнесэ составной сказуемоесь») идизе 1944-це иестэ. Эрзя-мокшонь келень секторонь прявтокс улемстэ М. Н. Колядёнков сёрмадсь научной ламо важо-девкст, конат нейгак эзть таштомо. «Эрзянь ды мокшонь кельтнесэ простой валрисьметнень теевемаст» докторонь диссертациянзо идизе 1957-це иестэ.

Школатнень туртов нолдась ламо программат, методикань коряс пособият, истя жо покш мель явсь валксонь анокстамонтень. Сонзэ сёрмадовкстнэ ды весе лия тевензэ алтазельть минек раськентень. Колядёнков ульнесь кочказь СССР-нь Верховной Советэнь ды Мордовиянь Верховной Советэнь депутатокс. Казезь Ленинэнь ды «Знак Почёта» ордентнесэ.

Учёноесь свал лездась од ломантненень аспирантурасо тонавтнемстэ, диссертациянь сёрмадомсто ды вейсэнь тевень топавтомсто.

Кулось М. Н. Коляденков 1967-це иень умарьковонь 5-це чистэ.