Краеведениянь кулят «Шкась. Тевтне. Ломантне»: Кемайкина Раиса Степановна

Умарьковонь 13-це чистэ тешксты эсь юбилеензэ Мордовия Республикань заслуженной поэтэсь, Россиянь Писателень союзонь членэсь Раиса Степановна Кемайкина (Маризь Кемаль).

Чачсь Чаунзабуень Вишка Маризь велесэ сокицянь-видицянь семиясо. Школань прядомадо мейле мольсь тонавтнеме Н. П. Огарёвонь лемсэ филологиянь факультетэв.

Вузонь прядомадо мейле Раиса Степановна колмо иеть важодсь эсест велень школасо, мейле мекев велявтсь Саранскоев. Важодсь «Эрзянь правдасо», А. С. Пушкин лемсэ Национальной библиотекасо, «Сятко» журналсо, «Чилисема» журналсо.

1988-це иестэ лиссь «Лавсь» стихень васенце пусмозо, седе тов 1994-це иестэ – «Штатол», 2007-це иестэ – «Ашо нармунть», 2013 иестэ – «Масторов нолдасынек сюкпрянок…» книганзо, печатавкшнось коллективной пусмотнесэ. Ламо валморонзо лангс сёрмадозь музыка.

Раиса Степановна, стихте башка, покш мель яви эрзянь фольклоронь, историянь, коень-кирдань тонавтнемантень. Истя, нолдась «Евксонь кужо», «Сынь ульнесть эрзят» «Котова таргазь монь палям…» книгатнень. Сёрмадсь покш статьят культурадо, религиядо, эрзянь койтнеде-кирдатнеде. Эрямонзо перть сон викшнесь зярыя эрзянь оршамот. Нейгак викшни ды тонавты одтнэнь те тевенень.

Библиотекань важодицятне арсить Раиса Степановнанень кеме шумбрачи, паро мельть-арсемат, шкинемасо од изнявкст!