Краеведениянь кулят «Шкась. Тевтне. Ломантне»: Хейкки Паасонен (1865–1919)

Покштояк покш путовкс эрзянь-мокшонь раськень культурантень, келентень, фольклоронтень тейсь Суоми масторонь кельсодыесь, фольклористэсь, этнографось, профессорось – Хейкки Пассонен. Сон содылинзе шведэнь, немецень, мадьяронь, рузонь, эрзянь-мокшонь, маринь, удмуртонь, хантынь, башкиронь ды лия кельтнень. Эрзянь-мокшонь финно-угристикасо Паасонен ловови пек паро фольклоронь пурныцякс ды келень проблемань содыцякс. Сёрмадсь тень коряс ламо важодевкст. Эйсэст кепедевить пек эрявикс кевкстемат.

Хейкки Паасонен чачсь 1865-це якшамговонь 2-це чистэ Миккели ошсо. 1881-це иестэ теке жо ошсонть прядызе лицеенть, кармась тонавтнеме Хельсинкинь университетсэнть. 1904-це иестэ саезь 1919-це иес (куломазонзо) сон – те университетэнть финно-угрань келень кафедрань магистра, мейле – профессор. Ученоенть ульнесь пек покш бажамозо самс мокшэрзянь масторов, пачкодсь 1889-це иень февральстэ. Весемезэ сон эрясь мокшотнень ды эрзятнень ютксо малав кавто иеть. Те шкастонть ученоесь ютынзе малав весе минек эрзя-мокшонь велетнень, а кой-конатнесэ ульнесь аволь весть ды Пензань, Нижнеень, Самарань, Симбирскоень, Казаненень, Саратовань, Тамбовонь ды Оренбургонь губерниятнень. Тесэ сон пурнась пек сюпав материал. Весе мезе пурнась-тейсь, совавтозь «Мордовская народная поэзия» ламо томсо лисезь книгас, конатнес совасть: балладат, урьвакстомань, мирденень лисемань морот, лайшемат, калмамонь, лемень кундамонь, озномань, коень-кирдань сёрмадомат, ёвкст, содамоёвкст – эрзятнень ды мокшотнень фольклорост. 

Хейкки Паасоненэнь аволь ансяк текеньсэ питнезэ-лезэзэ, улить лия важодевксэнзэяк, конатнень наукань ды культурань питнест эзь ёма минек шкастояк. Те «Мордовская хрестоматия», конась печатазель 1909-це иестэ. 

«Мордовская фонетика» – Паасоненэнь омбоце пек домка важодевксэзэ. Сон анокстазь кода магистрань диссертация. Те шкас «Фонетикась» саи эрявикс тарка мокшень ды эрзянь кельтнень историяст тонавтомасо. Паасоненен материалтнэнь коряс анокстазь «Мордовской словаресь», конасонть 15 тыщадо ламо панжома валт. Валксонтень совавтозь малав 100 эрзянь ды 100 мокшонь велень кортавкстнэстэ кель-валонь пурнавкст.

Паасонен теке кевкстеманть коряс сёрмадсь зярыя статьят, конат лиснесть наукань се шкань журналтнэсэ.

Хейки Паасоненнь кадсь пек покш тешкс минек культуранть, историянть, фольклоронть ванкшномасо.