Краеведениянь кулят «Шкась. Тевтне. Ломантне»: Чесноков Фёдор Маркелович

Панжиковонь 7-це чистэ топодевельть бу 130 иеть эрзянь сёрмадеентень, драматургонтень, СССР-нь Сёрмадыцянь вейсэндявксос совицянтень (1934) Фёдор Маркелович Чесноковнень (1896–1938).

Фёдор Чесноков чачсь Пенза ёнксонь Лопатинань буень Пылкова велесэ. Пылковань земской школань прядомадо мейле тонавтнесь Кутьинань кавтоиень училищасо. Кемготово иесэ уш кармась важодеме ушодкс школасо тонавтыцякс. Гражданской войнань иетнестэ тюрсь Восточной фронтсо.

1922-це иестэ саезь эрясь Московсо, тонавтнесь Якстере профессурань институтонь литературань отделениясо, Востоконь народтнэнь университетэнь аспирантурасо. 1932-це иес важодсь СССР-нь Центриздатонь эрзянь-мокшонь отделэнь редакторокс, Учпедгизэнь эрзя-мокшонь секциянь редакциясо, Саранскоев велявтомадо мейле (1933) – эрзя-мокшонь культурань НИИ-сэ литературань секторонь научной сотрудникекс. Ульнесь «Сятко» журналонь редколлегиясо ды МАССР-нь Сёрмадыцянь вейсэндявксонь правлениясо.

Эрзянь литературанть чачомазо кеместэ сюлмавозь Фёдор Маркелович Чесноковонь шкинеманзо марто. Сон сёрмадсь весе жанратнесэ: очеркть, статьят, фельетонт, ёвтнемат, валморот, пьесат, рецензият, ды эрьвасонть ульнесь мезе-бути од, лия сермадейтнень шкинемаст ёнов а молиця. Сон сёрмадсь ды нолдась ёвтнемань ды очеркень зярыя пусмот: «Велесь явовсь» (1926), «Лия киява» (1927), «Тетяка левкс» (1929), «Васень толт» (1932). Куломадонзо мейле лиссть «Ёвтнемат» (1959), «Од эрямонь увт» (1974) ды лият книганзо. Ламо ёвтнемат сёрмадсь эйкакштнэнь туртов. Седейшкавань мель сёрмадыцясь явсь эрзянь фольклоронтень, пурнась эйсэнзэ весе эрямонзо перть.

1938-це иестэ стяко чумондозель ды теке иень панжиковонь 23-це чистэ ледезель СССР-нь Верховной судонь военной коллегиянть кармавтоманзо коряс.

Компартиянь XX-це съездэсь велявтызе сёрмадыцянть валдо лемензэ.