Краеведениянь кулят «Шкась. Тевтне. Ломантне»: Баргова Тамара Сергеевна

Умарьковонь 13-це чистэ чачома чинзэ тешксты Россиянь Писателень ды Журнали- стэнь союзтнэнь членэсь, МР-нь Госпремиянь лауреатось, культурань заслуженной важодицясь Тамара Сергеевна Баргова. Сон А. С. Пушкинэнь лемсэ Национальной библиотеканть паро ялгазо, минек ловныцянок содасызь кода вадря журналистэнть, прозаикенть, кода эрзянь паро аванть.

Тамара Сергеевна Баргова чачсь Игнатбуень Андрейвелесэ. Прядызе М. Горький лемсэ Уральской госуниверситетэнь журналистикань факультетэнть. Мейле ульнесь васня Игнатбуень «Восход» райононь газетань отделэнь прявтокс, седе тов – «Эрзянь правда» газетань корреспондентэкс, отделэнь прявтокс. 1991-це иестэ саезь 2007-це иес важодсь Мордовиянь книгань издательствасо (редакторокс, художественной литературань отделэнь ветий редакторокс, издательствань прявт редакторокс). 2009–2010-це иетнестэ ульнесь «Сятко» журналонь ответсекретарекс. Ней ламо мель ды шка яви минек республикадонть, раськень койтнеде-кирдатнеде, содавикс ломантнеде книгатнень пурнамонтень.

Васенце произведениянзо – новелланзо ды зарисовканзо – лиссть эсест райононь «Восход» газетасонть кавксоце классо тонавтнемстэнзэ. Шкань ютазь сёрмадовксонзо кармасть максневеме республикань изданиятнесэ, совавтневеме вейсэнь пусмос. 1997-це иестэ лиссь васенце книгазо – «Вечкемань усият». Седе тов ловныцятне седейшкава вастызь «Мон ды монь ялган» (2004), «Паз, простямак» (2010), «Пластика движения» (2010) ёвтнемань, повестень ды очеркень пусмонзо.

А. С. Пушкинэнь лемсэ НБ-нь важодицятне ёвтыть Тамара Сергеевнанень лембе валт, арсить кеме шумбрачи, шкинемань келей ды кувака ки, валдо уцяска ды ламо маней, мазый чить!