Краеведениянь кулят «Шкась. Тевтне. Ломантне»: Андрей Григорьевич Борисов

Сундерьковонь 26-це чистэ топодевельть бу 100 иеть эрзянь содавикс фольклористэнтень, педагогонтень, филологиянь наукань докторонтень, профессоронтень А. Г. Борисовнень (1925–1991). Чачсь сон Атяшевской райононь Сабанцелесэ сокицянь-видинянь семиясо. Васня тонавтнесь велень школасо, мейле – Козловкань педучилищасо (Атяшевской район) (1943).

Борисов А. Г. – Ине Отечественной войнань участник. Войнадо мейле ульнесь Советской армиянь кадровой офицерэкс. 1959-це иестэ прядызе Н. П. Огарёв лемсэ МГУ-нь историко-филологической факультетэнть. Седе тов тонавтнеманзо поладокшнызе МНИИЯЛИЭ-сэ. 1964-це иестэ аспирантуранть прядомадо мейле 1991-це иес важодсь М. Е. Евсевьев лемсэ МГПИ-нь рузонь келень ды литературань, эрзянь-мокшонь келень ды литературатнень кафедрасо. Васня ульнесь прявт преподавателекс, шкань ютазь – доцентэкс, мейле – профессорокс. 1988-це иестэ идизе филологиянь наукань докторонь диссертациянть.

Фольклоронь пурнамонь тевентень А. Г. Борисов явсь пек покш мель ды тонавтнесь эйсэнзэ пингензэ перть: веле-веле ланга яксезь, сёрмалесь ёвкст-морот, тень тееме кармавтсь студентнэньгак. Меельцетнень марто пелень-пелль кизэ эрсесь фольклоронь практикасо. Минек раськень устно-поэтической творчествань сюпавчитнень пурнамга, сынь, ловт, ялго якизь Мордовиянь, Самара ёнксонь ды Россиянь лия областтнень, пачколесть эрзянь ламодояк ламо велес.

«Раз, два, три…» эйкакштнэнь туртов васенце кннганзо А. Г. Борисов сёрмадызе 1970-це иестэ. Седе тов мельга-мельцек печатазель «Диво-дивное, чудо-чудное» (1979), «Летят, летят утушки» (1982), «Как волк колядовать ходил» (1983). Эрзянь фольклоронь коряс седе ламо таштавксонзо совасть «Устно-поэтическое творчество мордовского народа» пусмонь 6-це томонтень (1972). Теде башка, Андрей Григорьевич анокстась эрзянь келень ды литературань зярыя тонавтнемапельть, валкст, сёрмадсь литературоведческой ды критической статьят.

А. Г. Борисов кулось 1991-це иень эйзюрковонь 19-це чистэ.